Փետրվարի 5-ին ամերիկյան «Նյու Յորք թայմս» հեղինակավոր թերթում լույս է տեսել մի խմբագրական, որը կոչվում է «Ոչ՝ Ադրբեջանի հետ ռազմական համագործակցությանը»։ Հոդվածում կարծիք է հայտնվում, որ չի կարելի սերտացնել այդ համագործակցությունը մի երկրի հետ, որտեղ չեն հարգվում ժողովրդավարության եւ մարդու իրավունքների նվազագույն նորմերը։ Ավելի մանրամասն՝ վաղվա համարում։
ՆԱԽԱԳԱՀՆԵՐՆ ԻՍԿԱՊԵՍ ԿՀԱՆԴԻՊԵՆ ԼՅՈՒՔՍԵՄԲՈՒՐԳՈՒՄ
Նախագահ Ռոբերտ Քոչարյանի մամուլի գրասենյակից հաստատեցին տեղեկատվություն այն մասին, որ մոտակա ամիսներին Լյուքսեմբուրգում նախատեսվում է անցկացնել Հայաստանի, Վրաստանի եւ Ադրբեջանի նախագահների հանդիպումը։ Ըստ մամուլի ծառայության ղեկավար Հասմիկ Պետրոսյանի, հանդիպման նախաձեռնությունը պատկանում է Եվրամիությանը, իսկ քննարկման առարկան լինելու է տարածաշրջանային համագործակցությունը։ Վերջերս Դավոսյան հանդիպումների ժամանակ եվրահանձնաժողովի նախագահ Ժակ Սանտերը հաստատեց այդ պայմանավորվածությունը։
ԿԱՐԵՎՈՐ Է Ա. ՔՈՉԱՐՅԱՆԻ ԽՈՍՔԸ
Կարդացեք նաև
Դեկտեմբերին Վահրամ Խորխոռունու սպանությունից հետո պաշտպանության եւ ՆԳ նախկին փոխնախարար, ԱԺ պատգամավոր Անդրանիկ Քոչարյանն «Առավոտին» ասել էր, թե Խորխոռունու սպանությունը չէր լինի, եթե բացահայտված լիներ Արծրուն Մարգարյանի դեմ կատարված մահափորձը։ Իսկ վերջինիս սպանության օրը Անդրանիկ Քոչարյանի հետ կապվել մեզ այդպես էլ չհաջողվեց։ Տեղեկություններ ստացանք միայն, որ նա փետրվարի 9-ին զբաղվել է իր մերձավոր ընկերոջ՝ Արծրուն Մարգարյանի թաղմանն առնչվող գործերով՝ դիահերձում եւ այլն։
ՍԵՓԱԿԱՆ ԴԻՄՈՒՄԻ ՀԱՄԱՁԱՅՆ
Աշխատանքից, սեփական դիմումի համաձայն, ազատվել է Արմավիրի (Հոկտեմբերյանի) քաղաքապետ Նորիկ Մնոյանը։ Տեղյակ աղբյուրները պնդում են, որ նա այնքան էլ ինքնակամ չի գրել այդ դիմումը։ Նրան, մեղմ ասած, խնդրել են։
