ԱԺ-ի այս արտահերթ նստաշրջանի օրակարգում է «ԱրմենՏել» ՀՁ-ի հիմնադրման եւ սեփականաշնորհման օրինականությունը ստուգող ժամանակավոր հանձնաժողով ստեղծելու մասին» որոշման նախագիծը։
Սակայն վաղօրոք պատգամավորներին բաժանվեց գլխավոր դատախազ Աղվան Հովսեփյանի հետեւյալ հաղորդումը ԱԺ նախագահ Խոսրով Հարությունյանին.
«1999 թ. հունվարի 14-ից ՀՀ վարչապետի առաջարկությամբ, ինչպես նաեւ հանրապետական մամուլում եղած հրապարակումների հիման վրա ՀՀ գլխավոր դատախազությունում ստուգվում են 1991-1998 թ.թ. ընթացքում հանրապետության բնակավայրերում կապի համակարգի զգալի մասի կազմալուծման պատճառները։ Ուսումնասիրության շրջանակներում ստուգվում են «ԱրմենՏել» համատեղ ձեռնարկության ստեղծման եւ գործունեության ընթացքում պետության շահերի պաշտպանությանն առնչվող հարցերը։
Ստուգման ընթացքում ՀՀ գլխավոր դատախազությունում խնդրին առնչվող նյութեր են ստացվել ՀՀ սահմանադրական դատարանից, սեփականաշնորհման, փոստի եւ հեռահաղորդակցության, վիճակագրության, պետական ռեգիստրի եւ վերլուծության նախարարություններից, ինչպես նաեւ «ԱրմենՏել» համատեղ ձեռնարկությունից։ Բացի այդ, բացատրություններ են վերցվել ՀՀ կապի նախկին նախարար Գ. Պողպատյանից, «Երեւանի քաղաքային հեռախոսային ցանց» նախկին պետական ձեռնարկության տնօրեն Ա. Ղահրամանյանից, պաշտոնատար այլ անձանցից։
Կարդացեք նաև
Հանձնարարական է տրվել ՀՀ ֆինանսների եւ էկոնոմիկայի նախարարությանը մասնագիտական ստուգումներ կատարելու մասին։
1999 թ. փետրվարի 5-ին նախապատրաստված նյութերի հիման վրա ՀՀ գլխավոր դատախազության պետական շահերի պաշտպանության վարչությունում ՀՀ քրեական օրենսգրքի 182 հոդվածի 2-րդ մասի հատկանիշներով հարուցվել է քրեական գործ»։
Հավելյալ նշենք, որ հաղորդումն ուղարկվել է փետրվարի 8-ին եւ, ըստ Էդվարդ Եգորյանի, ակնհայտորեն օգտագործվելու է որպես փաստարկ՝ խորհրդարանական հանձնաժողովի ստեղծումը խափանելու համար։
Էջը կենսագործեց
ԱՆՆԱ ԻՍՐԱՅԵԼՅԱՆԸ
