Այսօր Եվրոպայի խորհրդի խորհրդարանական վեհաժողովի Հայաստանի հարցով զեկուցող Դ. Վոլչիչի հետ հանդիպման ժամանակ «Առավոտը» բարձր հյուրերին ներկայացվեց որպես ընդդիմադիր թերթ: Թեեւ դա ուրախալի է եւ մեծ պատիվ, բայց հանուն արդարության պիտի հրաժարվենք այդ որակավորումից: Ավելորդ ճամարտակություններից զերծ մնալով անդրադառնանք այդ խնդրին: «Առավոտի» եւ իշխանության հարաբերությունների մասին: Հարգել, գնահատել եւ հարգում ենք մեր իշխանությանը: «Առավոտի» եւ ընդդիմության հարաբերությունների մասին: Իմաստուն մարդիկ եւ բարոյական գործիչներ են այնտեղ հավաքվել:
Սահմանափակվենք: Մենք չենք ուզում դառնալ ընդդիմադիր թերթ: Մենք չենք ուզում դառնալ իշխանամետ թերթ: Մենք չենք ուզում դառնալ լիբերալ: Մենք չենք ուզում դառնալ սոցիալիստ: Մենք ուզում ենք բոլորին հավասարապես տեղ տալ մեր թերթում, եւ, կարեւորը՝ որ դուք այդ ամենը կարդաք:
ՎԱՏ ԼՈՒՐ
Օգոստոսին սկսվեց տնտեսական ճգնաժամը Ռուսաստանում։ Ամբողջ աշխարհում վախեցան։ Տնտեսական համաշխարհային ճգնաժամը նոր փուլ էր մտնում։ Միայն մեր վարչապետն էր կտրիճ-կտրիճ հայտարարում, որ ռուսաստանյան իրադարձությունները մեր երկրի տնտեսության աննախադեպ վերելքի վրա ստվեր գցել չեն կարող։ Օրերս պարզվեց, որ մեր վարչապետի հետ համաձայն չէ ՀՀ-ում Ռուսաստանի դեսպանատունը։ Հավանաբար տնտեսական ճգնաժամի պատճառով ՌԴ դեսպանատունը կրճատումներ է սկսել։ Աշխատանքից առաջին հերթին ազատվել են դեսպանատան ՀՀ քաղաքացի աշխատակիցները։ Ա. Դարբինյանի լավատեսական (վարդագույն) տրամադրություններին ու տրամաբանությանը հակառակ մեր հայրենակիցները կորցնում են իրենց բարձր վճարովի աշխատատեղերը։
