«Առավոտը» խնդրեց ԳԽ նախկին փոխնախագահ, այժմ ՀՀ նախագահի խորհրդական Արտաշես Թումանյանին անկեղծորեն պատասխանել, թե արդյոք խորհրդարանի ղեկավարությունը ցանկության դեպքում կարողանո՞ւմ էր տեղեկանալ փակ, գաղտնի քվեարկության անվանական տվյալներին։
«Պատասխանս բացարձակ անկեղծ է,- ասաց Արտաշես Թումանյանը։- Որպես նախկին խորհրդարանի փոխնախագահ, չեմ բացառում, որ կարող են գաղտնազերծման հնարավորություններ լինել։ Բայց ինքս անձամբ դրան մասնակցելու հնարավորություն չեմ ունեցել։ Այսինքն, չնայած նման բանի երբեք չեմ մասնակցել, բայց արդեն որպես ինժեներ, կարող եմ կասկածել, որ կարելի է համակարգչից այդ տվյալները ստանալ։ Չէ՞ որ այնտեղ ուղղակի «բլոկ» է արվում, որ անվանական քվեարկության արդյունքները համակարգչի հիշողության մեջ չմնան, բայց կարելի է այնպիսի ծրագիր ունենալ, որ ինչ-որ տեղ այդ տվյալները պահպանվեն։ Այնպես որ, չեմ բացառում»։
Նշենք, որ Վանո Սիրադեղյանին քրեական պատասխանատվության ենթարկելու եւ կալանավորելու համաձայնություն տալու գաղտնի քվեարկության առնչությամբ ԱԺ նախագահ Խոսրով Հարությունյանը հայտարարեց. «Եթե անհրաժեշտություն կա՝ մենք կարող ենք նույնիսկ պատգամավորներից հանձնախումբ ստեղծել քվեարկությունից անմիջապես հետո այդ պրոցեսորը վերացնելու համար։ Եթե կասկածի նշույլ կա՝ գնանք այդ ճանապարհով»։
Կասկածողներ չկային։
Կարդացեք նաև
Ա. Ի.
