«Առավոտը» դիմեց նախկին նախագահի գրասենյակ, խնդրելով Լեւոն Տեր-Պետրոսյանին մեկնաբանել այն միջնորդությունը, որով վերջերս Ազգային ժողովում հանդես է եկել հանրապետության գլխավոր դատախազը։
Խմբագրությունը ստացավ նախկին նախագահի հետեւյալ գրավոր պատասխանը. «Հունվարի 25-ին մենք ականատես եղանք մի իրադարձության, որն իր ցինիզմով եւ վտանգավորությամբ դեռեւս նախադեպ չի ունեցել որեւէ քաղաքակիրթ երկրի կյանքում: Հանրապետության դատախազը խորհրդարանի բարձր ամբիոնից հանդես եկավ ծանրագույն քրեական մեղադրանքով՝ հիմնված ընդամենը մեկ մարդու ցուցմունքների վրա: Նման դեպք չի արձանագրվել անգամ Վիշինսկու դատական պրակտիկայում: Եթե մեր իշխանությունները որոշել էին խայտառակել Հայաստանը, ապա նրանց կարելի է շնորհավորել. դա միանգամայն հաջողվեց: Ինչ վերաբերում է խայտառակության գլխավոր դերակատարին՝ հանրապետության դատախազին, ապա նա կամ բացարձակ անգրագետ է, կամ էլ՝ հլու կամակատար, երկու դեպքում էլ՝ լուրջ փորձանք հայ ժողովրդի համար, որից պետք է շուտափույթ կերպով ազատվել։ Մերժելով դատախազին, եւ այդպիսով արձանագրելով նրա մասնագիտական անպիտանելիությունը, խորհրդարանը գտնվեց իր բարձրության վրա։ Հերթը ժողովրդինն է, որովհետեւ նման դատախազը մեկ չարակամի վկայությամբ կարող է քրեական գործ հարուցել ցանկացած քաղաքացու նկատմամբ»։
