Հանրապետության ակտիվ եւ, ինչպես իրենք բնորոշեցին, «առողջ» կանայք եւ տղամարդիկ, այլ կերպ ասած, «Հայկանդուխտ» ավանդապահ-ժողովրդավարական «խառը» կուսակցությունը, իր բողոքի ձայնը միացրեց այս ու այն սակագների (եւ ոչ միայն) բարձրացման դեմ պայքարողների ձայնին։ Ընդ որում, մայրաքաղաքի մի քանի տեղերում։ Յուրաքանչյուր հարց բարձրացվել է համապատասխան տեղում. խաբված ավանդատուները հավաքվել էին Կենտրոնական բանկի մոտ, հայտնի գործարքներում մեղավոր պաշտոնյաներին դատել պահանջողները՝ դատախազության առաջ։
Այս վերջիններն էլ դրսեւորել են չափազանց մեծ ակտիվություն եւ, պատժի միջոցներից, տեղում կիրառել մեքենա շրջելը։ Մինչ ՀՀ նախագահի նստավայրում լրագրողների մի մասը սպասում էր քաղաքի տարբեր մասերում «բողոքող» հայկանդուխտցիներին եւ խաբված ավանդատուներին, գլխավոր հայկանդուխտ Արմենուհի Ղազարյանը իրեն հատուկ պաթոսով ներկայացնում էր իրենց պահանջները։ Դրանց թվում ամենակարեւորը Հրանտ Բագրատյանին, Վահրամ Ավանեսյանին, Արմեն Եղիազարյանին դատական պատասխանատվության ենթարկելու եւ ավանդները վերադարձնելու պահանջն էր։ Այս եւ մյուս պահանջները թվարկելու ժամանակ «գող-ավազակ, գող-բանդիտ, պրոֆեսիոնալ եւ արհեստավարժ գող» արտահայտություններով տիկին Ղազարյանը «նախշեց» ՀՀ կառավարությանը՝ վարչապետի գլխավորությամբ։ Իրենց պահանջները հայկանդուխտցիները առայժմ կներկայացնեն բանավոր, հետո կորոշեն, թե երբ գրի կառնեն դրանք։
ԱՐԵՎՀԱՏ ԳՐԻԳՈՐՅԱՆ
