«ԱրմենՏելի» հարցով իշխանության «ինքն իր դեմ» պայքարի դիալեկտիկական գործընթացն անցյալ շաբաթ բարեհաջող ավարտ ունեցավ: Երկար պրպտումներից հետո իշխանամետ կուսակցությունների ղեկավարները /մասնավորապես՝ նախագահի խորհրդականները/ կարողացան պարզել, որ «ԱրմենՏելի» գործարքը ընդհանուր առմամբ Հայաստանի համար շահավետ է, իսկ եթե ինչ-որ տեղ, ինչ-որ տեսակետից շահավետ չէ, ապա դրանում մեղավոր են նախորդ իշխանությունները: Այսինքն, «ԱրմեՏելի» սեփականաշնորհման մասին փաստաթուղթը, որը ստորագրել են Տեր-Պետրոսյանը, Պողպատյանը, Քոչարյանը, Դարբինյանը եւ Ավանիսյանը, վատն է այնքանով, որքանով այնտեղ կան առաջին երկուսի ազգանունները եւ փայլուն է այն չափով, որով առկա են վերջին երեքի ստորագրությունները:
«Եվրոուղին» Հայաստանում բացահայտվեցին մեր երկրի եվրոպական զարգացման նոր ջատագովներ: Դրանք ՀՀՇ-ի հերթական «դիսիդենտներն» են՝ ԱԺՄ-ից, ԱԱ-ից, ԱՊ-ից, «Ազատությունից», «Ժողովրդավարական հայրենիքից», «21-րդ դարից» հետո դա այդ կուսակցության մեջ արդեն 7-րդ, թե 8-րդ «վերականգնումի շարժումն» է: Նոր կազմակերպությունը կոչվում է կարճ եւ համեստ՝ «Եվրոուղի»: Եվ դա տրամաբանական է. ՀՀՇ-ն իսկապես մեծ ներդրում ունի Հայաստանը քաղաքակիրթ եվրոպական չափանիշներին մոտեցնելու գործում: Բավական է ասել, որ նրա իշխանության օրոք արգելվեց կուսակցություններից մեկը եւ փակվեցին նրա թերթերը, իսկ զինված ՀՀՇ-ականները /երկրապահները/ վերջին երեք ընտրություններում ապահովեցին իշխանության հաղթանակը:
Էլ չենք խոսում կենցաղի եվրոպական ստանդարտների մասին. երեք ձմեռ շարունակ մենք ազգովի, միանգամայն եվրոպական ձեւով, գիշերները զբոսնում էինք Երեւանի պուրակներով՝ հարմար ծառ կտրելու նպատակով: Ֆրենսիս Գ.Սիբամբան Հայոց դիվանագիտությունն անցած շաբաթ եւս մի կարեւոր հաղթանակ տարավ՝ նախարար Օսկանյանին հավատարմագրերի կրկնօրինակներն է հանձնել Զամբիայի արտակարգ եւ լիազոր դեսպան Ֆրենսիս Գ.Սիբամբան: Ֆրենսիսն ու Վարդանը միանգամայն տրամաբանորեն նշեցին, որ անհրաժեշտ է բազմակողմանիորեն զարգացնել հայ-զամբիական հարաբերությունները: Այդ մտադրությունը խիստ խրախուսելի է՝ հաշվի առնելով հայ-զամբիական դարավոր բարեկամությունը, ավանդույթների եւ մշակույթների մոտիկությունը, ինչպես նաեւ պատմական ճակատագրի ընդհանրությունները:
Օսկանյան-Սիբամբա եւ Քոչարյան-Սիբամբա պատմական հանդիպումները արժանի հակահարված են բոլոր նրանց, ովքեր խոսում են Հայաստանի միջազգային մեկուսացման մասին:
Կարդացեք նաև
ԱՐԱՄ ԱԲՐԱՀԱՄՅԱՆ
