Պատասխանելով «Առավոտի» հարցին, թե ինչու չի ընդգրկվում «Եվրոուղի» հասարակական կազմակերպության մեջ, «Հանրապետություն» պատգամավորական խմբի նախագահ Բաբկեն Արարքցյանն ասաց. «Ես մեծ հետաքրքրությամբ հետեւում եմ այդ կազմակերպության ստեղծման գործընթացին։ Երբ այն կայանա, ես կմասնակցեմ նրա համագումարին»։ Իսկ ինչո՞ւ Բաբկեն Արարքցյանը չի մասնակցել ՀՀՇ համագումարի անցկացումը նախապատրաստող կազմկոմիտեի հունվարյան նիստին. «Դե, մեկին մասնակցել եմ, մյուսին՝ ոչ, զբաղվածության պատճառով»։
ԵՎՍ ՄԵԿ ԽԵԼԱՄԻՏ ԵՐԿՐԱՊԱՀ
Ամբողջ հանրապետությունը հեռուստատեսությամբ տեսավ, որ հունվարի 19-ին «Արմենպրեսի» մամլո սրահում ասուլիս տվեց կառավարության վերահսկողական ծառայության պետ Գագիկ Պողոսյանը։ Հատկանշականն այն է, որ «Երկրապահ» պատգամավորական խմբի հետ վերջին հանդիպումներից մեկի ժամանակ Վազգեն Սարգսյանն առանձնակի ուշադրություն է դարձրել Գագիկ Պողոսյանի հարցազրույցների առատության հանգամանքին, ասելով՝ չլինի թե ուզում ես շատ խելամիտ երեւալ։
ՆՐԱՆՑ ԴԵՌ ՀԻՇՈՒՄ ԵՆ
Կարդացեք նաև
«Արմենիա-2» հյուրանոցից դուրս գալիս, դռնապանը ելքի դուռը բացելով ԱԺ նախկին փոխխոսնակ՝ այժմ միայն պատգամավոր Արա Սահակյանի առջեւ, ասաց. «Միշտ մարտական վիճակում, միշտ գործի մեջ»։ Պրն Սահակյանի ականջին խիստ ախորժալուր հնչեց այս հաճոյախոսությունը. «Տեսնո՜ւմ եք, ոնց է ժողովուրդը մեզ սիրում եւ գնահատում»։
ՎԻՐԱՎՈՐ ԼՈՐԻԿ
«Դուք է՞լ եք մանկուց խավիար կերել»,- հարցին ի պատասխան փոստի եւ հեռահաղորդակցության նախարար Արտակ Վարդանյանն ասաց, որ ինքն ավելի շատ լոր է սիրել։
