Ինչպես «Առավոտին» տեղեկացրին ԱԳՆ լրատվական վարչությունից, արտգործնախարար Վարդան Օսկանյանը հունվարի 5-ին Լոս Անջելեսում հանդիպեց ամերիկահայ հայտնի միլիարդատեր Քըրք Քըրքորյանին։
ԳԻԱՐՔՄԻ-Ն ՀՅԴ-Ի ՀԵՏ ԱՅՆՔԱՆ ԷԼ ՎԱՏ ՉԻ
«Քննադատելով Դաշնակցությանը, ԳիԱրՔՄի-ի խորհրդի անդամ Աղասի Արշակյանը միայն իր անձնական կարծիքն է արտահայտել,- «Առավոտին» հայտնեց ԳիԱրՔՄի-ի խորհրդի նախագահ Ալեքսանդր Աղամալյանը։- Մեր խորհրդի մոտեցումներն այս խնդրում տարբերվում են։ Ճիշտ է, կան հարցեր, որոնց վերաբերյալ մեր տեսակետները տարբեր են ՀՅԴ մոտեցումներից, բայց վիճահարույց բոլոր հարցերը մենք փորձում ենք ուղղակի բանակցությունների միջոցով լուծել»։
Է. ՄՈՒՐԱԴՅԱՆՆ ԱՌԱՅԺՄ ՓՈԽՆԱԽԱՐԱՐ Է
Կարդացեք նաև
Երեկ խմբագրություն զանգահարեց էկոնոմիկայի եւ ֆինանսների փոխնախարար Էդվարդ Մուրադյանը եւ ճշտեց, որ նա թեեւ հանձնել է համապատասխան քննություն (ստանալով 98 միավոր) եւ ընդգրկվել պիտանիության ցուցակում, սակայն դատավոր չի նշանակվել եւ աշխատում է նույն պաշտոնում։
ՊՈՏԵՆՑԻԱԼ ՎԱՐՉԱՊԵՏԸ ՓՈԽՆԱԽԱՐԱ՞Ր Է
Հաշվի առնելով, որ «Առավոտի» անգամ չճշտված լուրերն են վաղ թե ուշ իրականություն դառնում, շտապում ենք ներկայացնել հետեւյալը. ՀՀ առեւտրի, արդյունաբերության եւ զբոսաշրջության նախարարի երեկվա ասուլիսի ողջ ընթացքում նախարարի կողքին էր նաեւ փոխնախարար Մովսես Ձավարյանը։ Լրագրողներից մի քանիսը շշուկով, բայց համոզված պնդում էին, որ հենց նա՛ է լինելու մեր ապագա վարչապետը։ Փաստորեն, Վազգեն Մանուկյանի անվան կողքին՝ մինչեւ նոր, չճշտված լուրերը, կարելի է՝ որպես պոտենցիալ վարչապետ դնել նաեւ պրն Ձավարյանի անունը։
