ՀՀ պետբյուջեն վատ սովորություն ունի պարբերաբար սրան-նրան պարտք մնալու։ Անցյալ տարի բացառություն չէր նաեւ «Հայդեղագործություն» պետական փակ բաժնետիրական ընկերությունը։ Անցյալ աշնանը մի քանի անգամ ընկերությունը նույնիսկ սպառնաց՝ պարտքը չմարելու դեպքում դադարեցնել դեղամիջոցների առաքումը դեղատներ։ Սպառնալիքը չիրականացվեց, քանի որ բյուջեն հասցրեց գլխի ընկնել, որ նման հարցերում կատակներ չեն անում, եւ գրեթե անմիջապես մարեց պարտքերը։ «Հայդեղագործություն» ՊՓԲ ընկերության փոխտնօրեն Գագիկ Մկրտչյանը հայտնեց, որ թեեւ 1998-ին նոր տենդեր է եղել, նոր պայմանագիր է ստորագրվել, սակայն դեղերի դիմաց գումար չի վճարվել։ Իրենք էլ դեղերը բաց չեն թողել։ Այնպես որ, պետությունը 1998-ի հետ հաշիվները փակել է առանց «Հայդեղագործության» հետ պարտքերի։
Անցյալ տարի պրոբլեմներ առաջացան նաեւ թմրադեղերի առաքման բլանկների փոփոխության հետ կապված։ Բլանկները փոխելու որոշումը կար, բլանկները չկային ուղիղ վեց ամիս։ Հետո առողջապահության նախարարությունը մի կերպ շտկեց դրությունը։ Պրն Մկրտչյանը հավաստիացրեց, որ դրությունը շտկված է վերջնականապես. նոր բլանկներն արդեն կան, դեղատները դրանցով թմրադեղեր են վաճառում հիվանդներին։
Ա. ԳՐԻԳՈՐՅԱՆ
