Ազգային ժողովի նախագահ Խոսրով Հարությունյանը կազմավորել է Եվրոպայի խորհրդի Խորհրդարանական վեհաժողովի աշխատանքներին մասնակցելու նպատակով Ստրասբուրգ մեկնելիք պատվիրակությունը։ Նրանում իրենց տեղերը պահպանել են Արմեն Մարտիրոսյանը («Բարեփոխումներ»), Գայանե Սարուխանյանը («Շամիրամ») եւ Ֆրունզե Խառատյանը (Կոմկուս)։ Երկրապահ Հրաչ Գրիգորյանը փոխարինվել է ԱԺՄ-ական Արշակ Սադոյանով։ Ու թեպետ ԵԽ ԽՎ կանոնակարգը պահանջում է, որ ստրասբուրգյան նիստերին մասնակցեն հիմնական խմբերի եւ խմբակցությունների ներկայացուցիչները, սակայն ոչ «Երկրապահը», եւ ոչ էլ «Հանրապետությունը» Եվրոպայի խորհրդի մայրաքաղաք մարդ չեն ուղարկի։
GREETING
Հավաքեք Մարիոտ-Արմենիայի հեռախոսահամարը եւ կլսեք մի հաճելի ձայն, սակայն նրա ասածից ոչինչ չեք հասկանա։ Շփոթված կդնեք հեռախոսը եւ մի անգամ էլ կզանգեք։ Նույն ձայնը կլսեք եւ ձեր նույնիսկ ոչ ուժեղ անգլերենը թույլ կտա հասկանալ, որ ձեզ ողջունում են եւ պատրաստ են լսելու։ Դուք կկարծեք, թե զանգել եք որեւէ անգլիալեզու երկրի դեսպանատուն։ Չէ, այդպես չէ, դուք իսկապես Մարիոտ- Արմենիա եք զանգել։ Կարելի է պատճառաբանել, թե տնօրինությունը օտարալեզու է, ոչինչ, թող անգլերեն ողջունեն։ Թող տնօրինեն, իհարկե, միայն թե՝ Հայաստանի օրենքների սահմաններում։ Իսկ եթե միջազգային հյուրանոցի հավակնություններ ունեն, թող դառնան այդպիսին, հետո կտեսնենք։
ՂԱՐԱԲԱՂՑԻՆԵՐԻ «ՎԼԱՍՏԸ»
Կարդացեք նաև
Վերջին օրերին Երեւանում լայն տարածում է գտել հետեւյալ անեկդոտը. մի ղարաբաղցի ժամանում է Հայաստանի մայրաքաղաք ու տեսնելով անկյունում հավաքված երեւանցիներին, հարցնում. «Հունց ո՞ւք»։ Երեւանցիներն էլ ձեռքները վեր տնկելով ասում են. «Ոնց ասեք»։
