Հեռահաղորդակցության հանրապետական կենտրոն ՊՓԲԸ-ն հունվարի 1-ից շուրջ 25 անգամ թանկացրել է ամենամյա հաճախականության շահագործման վարձավճարը։ Եվ այն այժմ նախկին 232800 դրամի (շուրջ 450 դոլարի) փոխարեն կազմում է 6 մլն դրամ (շուրջ 12 հազար դոլար)։ Ընդ որում, սակագների անհամաձայնության դեպքում՝ հեռուստաընկերությունների հետ պայմանագիրը լուծարվելու է։ Եթե այս ամենն ուժի մեջ մնա՝ հունվարի 25-ից հետո կդադարեն գործել որոշ մասնավոր եւ անկախ հեռուստաընկերություններ։
Մանրամասները՝ հաջորդիվ։
«ՀԱՅՈՑ ԱՇԽԱՐՀԸ» 16 ԷՋՈՎ
«Հայոց աշխարհ» օրաթերթի գլխավոր խմբագիր Գագիկ Մկրտչյանից «Առավոտի» թղթակիցը տեղեկացավ, որ նրա գլխավորած պարբերականը փետրվարի 1-ից լույս կտեսնի 16 էջով։ «Դրա համար հատուկ պատճառ չկա, թերթն իր լրագրողական պոտենցիալով վաղուց պատրաստ էր 16 էջի, բայց ֆինանսական միջոցների սղության, եւ հետեւաբար, տեխնիկական անհրաժեշտ բազա չունենալու պատճառով, դրա հնարավորությունը չունեինք։ Մոտ օրերս կստանանք կառավարության կողմից մամուլին հատկացվող օժանդակությունը, ինչը հնարավորություն կտա թերթի տեխնիկական բազան համապատասխանեցնել 16 էջի ծավալներին։ Ի վերջո, ուզում ենք մրցակցել «Առավոտի» հետ։ Վստահ եմ, որ դա կստացվի, ինչից կշահեն երկու թերթն էլ»,-ասաց Գագիկ Մկրտչյանը։
Կարդացեք նաև
ՄԱՆՐԱՄԱՍՆԵՐ
Իր ինքնությունը բացահայտել չցանկացող մի գործիչ «Առավոտին» հայտնեց, որ այն սավառնակը, որով վթարի էր ենթարկվել Վալերի Քոչարյանը, նրան նվիրել էր նրա մտերիմ ընկերը՝ Աբովյանի գարեջրի գործարանի փայատեր Գագիկ Ծառուկյանը (Դոդի Գագոն)։ Վերջինս ինքն էր, մեր լրատուի հավաստիացմամբ, իրեն ասել այդ մասին։ Նա նաեւ «ուղղակի ծիծաղելի» անվանեց մամուլում հրապարակված այն պնդումը, թե մոտոցիկլետի շարժիչով այդ սավառնակն ընդամենը 17 դոլար արժեր, եւ առաջարկեց փորձել 17 դոլարով մոտոցիկլետի շարժիչ գնել։
