Սովորաբար նոր տարվա նախօրեին հանրապետության նախագահը բարեմաղթանքներով ու բազմաթիվ խոստումներով շնորհավորում է մեր բազմաչարչար ու ամենահամբերատար ժողովրդին, փոխանակ ձմեռ պապի նման ամենքիս մի համեստ նվեր տա։ Դա նրա համար եմ ասում, որ ամեն անգամ հույսուհավատով սպասում ենք այդ նոր տարիներին, բայց, չգիտես ինչու, նախագահի բարեմաղթանքներն ու ցանկությունները երբեք տեղ չեն հասնում, իսկ խոստումներն էլ չեն կատարվում։ Երեւի չար աչք է մեզ կպել…
Ժողովուրդ ջան, եկեք այս անգամ փորձենք հակառակն անել։ Կարող է, մի բան ստացվի։ Համաժողովրդական մեծ հոգով ու սրտով, բոլոր սարքին հեռուստացույցերով, մենք ինքներս ամանորի շնորհավորանքներ ու բարեմաղթանքներ հաղորդենք մեր իշխանավորներին՝ ցանկանալով նախ՝ քաջառողջություն, հետո՝ նրանց այն գործերի հաջողություն, որոնք կատարվելու են երկրի տնտեսության զարգացման ու մեր թշվառ վիճակի բարելավման համար։
Եկեք սիրենք մեր իշխանավորներին, որ նրանք իրենց լավ զգան (թե չէ միշտ փնովում ենք ու հայհոյում), որ աշխատեն բարձր տրամադրությամբ, նաեւ նվիրվածությամբ ծառայեն մեզ ու մեր երկրին։ Խոստանանք նաեւ, որ նոր տարվանից սկսած, մեր իշխանավորների մասին ոչ մի վատ խոսք չենք ասի, կլսենք իրենց, ջրի ու լույսի վարձը կվճարենք, տան ու հեռախոսի վարձերը՝ նույնպես (որ ժամանակին նրանք աշխատավարձ ստանան)։ Նաեւ ոչ մի բողոք չենք անի, աշխատատեղ չենք պահանջի, չենք ասի՝ թոշակները, նպաստներն ու աշխատավարձերը բարձրացրեք, օգնություններ տվեք, ու էլ չենք գնա այլ երկրներում աշխատելու կամ ապրելու. կասենք՝ մերն ուրիշ է…
Բայց մի մտավախություն կա։ Դե, մենք հայ ժողովուրդ ենք, կդիմանանք այս բոլորին։ Կարող է ընդդիմադիր կուսակցությունները չդիմանան ու էլի հանրահավաքներ անեն, չթողնեն մեր սիրելի իշխանավորներին իրենց գործերը հանգիստ, առոք ու փառոք վերջացնել եւ մեր ամանորի ցանկությունները բարեհաջող կատարել։ Պետք է մի բան անել… Եկեք, ժողովուրդ ջան, մենք էլ սկսենք հանրահավաքներ անել, թեկուզ՝ ամեն օր, որ էդ ընդդիմադիր Վազգենը կամ էլ կոմունիստ Բադալյանը տեղ չունենան հավաքվելու ու մեր իշխանավորների դեմ վատ խոսելու։ Եկեք նոր տարվանից կազմակերպենք շուրջօրյա հանրահավաքներ (մեկ է՝ պարապ ենք), որտեղ կգովաբանենք ու կգովազդենք մեր սիրելի իշխանավորների լավ գործերն ու արարքները։ Չմոռանանք նաեւ գնալ եկեղեցի՝ մոմ վառելու, որ չար աչքը հանվի։ Գուցե Աստված բարին կատարի…
Կարդացեք նաև
ԴԵՐԵՆԻԿ ՄՈՎՍԻՍՅԱՆ
