Ըստ ստույգ տեղեկությունների, հարկային տեսչության նոր պետ Սմբատ Այվազյանն Արթիկի հարկայինի ստորաբաժանման պետին ազատել է այն պատճառով, որ նրա ղեկավարած միավորում այնքան էլ պարզ չի երեւում, թե ի՞նչ է եղել շուրջ 1 մլն հատ ակցիզային դրոշմանիշ։ Հիշեցնենք, որ երկու դրամանոց այդ դրոշմանիշը սեւ շուկայում 40 դրամով է վաճառվում։
ՍՏՈՒԳՈՂՆԵՐԻ ՀԵՂԵՂ
ԱԺ-ի պետաիրավական հարցերի հանձնաժողովը դեկտեմբերի 23-ին լսումներ է անցկացնելու «Ստուգումների կազմակերպման իրավական հիմքերը Հայաստանում» թեմայով։ Լսումներին հրավիրված են հարկային տեսչության, ՆԳ եւ ԱԱ նախարարության, դատախազության, նախագահի եւ կառավարության վերահսկողական ծառայությունների ղեկավարները։
ԵՂԲԱՅՐՈՒԹՅԱՆ ՈՒՂԻՈՎ
Կարդացեք նաև
Վրաստան է մեկնել ՀՀՇ պատվիրակությունը, որը Թբիլիսիում հանդիպելու է Էդուարդ Շեւարդնաձեի հետ։ Դեկտեմբերի 21-ին եղբայրական Վրաստան ուղեւորված ՀՀՇ-ականների պատվիրակության կազմում ընդգրկված են Ալեքսանդր Արզումանյանը եւ Տիգրան Հակոբյանը։
ՄԻՔԱՅԵԼԸ ՔԵԶ ՀԵՏ Է, ՍԱԴԱ՛Մ
Սադամ Հուսեյնի լավագույն բարեկամ, Ազգային պահպանողական կուսակցության ղեկավար Միքայէլ Հայրապետեանը Իրաքի առաջնորդին զորակցության նամակ է ուղարկել։ Նամակն ստորագրել են նաեւ «Հայ դատ» կազմակերպությունը, «Ազգային վերածնունդ» «Հայ աշխատավորների կուսակցությունը»։
… Հուսանք, որ եթե Իրաքը երբեւէ քիմիական զենք կիրառի մարդկության դեմ, վաղօրոք կհոգա Միքայէլ Հայրապետեանի, ինչպես նաեւ նշված կուսակցությունների անվտանգությունը։
