Ազգային ժողովի սրահները վերջին օրերին ուղղակի մեղվափեթակի են վերածվել։ Դեկտեմբերի 14-ին խոսվում էր, թե արդեն լուծված հարց է, որ վարչապետ է նշանակվելու ԱԺՄ վարչության նախագահ Վազգեն Մանուկյանը։ Նախորդ օրերին նույն սրահներում խոսվում էր, թե բյուջեի ընդունումից հետո լուծարվելու է Ազգային ժողովը, իսկ մինչ այդ գլխավոր դատախազն է ներկայանալու խորհրդարան՝ 3-4 պատգամավորի ձերբակալելու թույլտվություն ստանալու համար։
ՄԱՀ ԿԱՄ ՀԱՐԿԱՅԻՆ
Ըստ որոշ լուրերի, գործարարների հետ զրույցում հարկային տեսչության նոր պետ Սմբատ Այվազյանը հայտարարել է. «Ամեն ինչից հնարավոր է խուսափել, բացի մահվանից եւ հարկային տեսչությունից»։
ԱՆՀԱՍՑԵ ՄԱՐԴԻԿ
Կարդացեք նաև
Ինչպես «Առավոտին» հայտնեց լրագրող Վահան Իշխանյանը, Ազգային հեռուստատեսության գործադիր տնօրեն Տիգրան Նաղդալյանը հրաժարվել է եթեր հեռարձակել Էդիկ Բաղդասարյանի եւ իր «Անհասցե մարդիկ» ֆիլմը, որը պատմում է աղետի գոտու եւ այնտեղ ապրող մարդկանց մասին։ Ըստ հեղինակի, Տիգրան Նաղդալյանը պահանջել է ֆիլմից մոնտաժել մի քանի «ոչ ցանկալի հատվածներ»։ Պրն Իշխանյանը ավելացրեց նաեւ, որ «Ար» հեռուստաընկերությունը սիրով եթեր է հաղորդել ֆիլմը։ «Առավոտի» խնդրանքով մեկնաբանելով այդ լուրը, Տիգրան Նաղդալյանն ասաց, որ իր պահանջները վերաբերում էին ֆիլմում հնչած այն հայտարարություններին, որոնք հեղինակների կողմից որեւէ ձեւով չեն ապացուցվում, ինչպես նաեւ մի շարք այլ՝ զուտ պրոֆեսիոնալ խնդիրներին։ Պրն Նաղդալյանի տվյալներով, «Անհասցե մարդիկ» ֆիլմը փոքր-ինչ սեղմած ձեւով ցույց է տրվել մոսկովյան «TB-центр» ալիքով։
