Որքանո՞վ են ճիշտ այն լուրերը, որ երկրապահները կոմունիստների հետ համաձայնության էին եկել համամասնական-մեծամասնական մանդատները 50-50%-ով բաժանելու մասին։ Պատասխանելով «Առավոտի» այդ հարցին, «Երկրապահի» ընտրական օրենսգրքի պատասխանատու Վիկտոր Դալլաքյանը հավաստեց նման առաջարկի իսկությունը, ասելով նաեւ, թե իրենք դեռ այն չեն քննարկել։
4000 ՀՍԿԻՉ ՄԵՔԵՆԱ
Չնայած հնչած բազմաթիվ հարցադրումներին, էկոնոմիկայի եւ ֆինանսների նախարար Էդվարդ Սանդոյանն այդպես էլ չորոշակիացրեց, թե քանի հսկիչ դրամարկղային մեքենա է բերվել հանրապետություն։ Ըստ «Առավոտ» հասած տեղեկությունների, առաջին խմբաքանակն արդեն հասել է Հայաստան՝ շուրջ 700 միավոր։ Նախատեսվում է եւս 3300 հսկիչ դրամարկղային մեքենաների ներկրումը Ռուսաստանից եւ Թուրքիայից։
ԳԻՆ ԵՄ ԱՍԵԼ
Կարդացեք նաև
Ըստ որոշ տեղեկությունների, օրերս 300 հազար դոլարով վաճառվել է Մերգելյան ինստիտուտի մերձակայքում գտնվող այն խանութը, որը ժամանակին պատկանել է Մերգելյան ինստիտուտի ջոկատին։ Հետագայում այն, ըստ նույն աղբյուրների, անցել է մերգելյանական ծագում ունեցող գործիչներից մեկին։
ԲԱՐԵՎ, ԼԱՎ ԵՄ
«Հանրապետություն» միավորման պատգամավորներից մեկը դեկտեմբերի 4-ին ներկայացել է խմբակցության նախագահ Բաբկեն Արարքցյանին ու ասել.
-Ալբերտ Բազեյանը շփոթված է։
-Ինչո՞ւ։
-Միջանցքում իրեն տեսա, ասացի բարեւ Ձեզ պրն Բազեյան, պատասխանեց՝ լավ եմ։
Ո՞ՒՐ ԷԻՐ, ՆԱԽԱՐԱՐ
Ըստ որոշ լուրերի, էներգետիկայի ներկայիս նախարարը մինչեւ պետական համակարգում աշխատանքի անցնելն ակտիվ առեւտրով է զբաղված եղել Մալաթիայի շուկայի հարեւանությամբ գտնվող մի խանութում։ Այնպես որ, շատերը կարող են նրանից եւ ձու, եւ շաքարավազ գնած լինել։
