Թեպետ կանխավ հայտարարվել էր, որ Եվրոպայի խորհրդի շրջանակներում Լեռնային Ղարաբաղի վերաբերյալ դեկտեմբերի 16-ին Փարիզում նախատեսված լսումներին պետք է նախորդի բուդապեշտյան հանդիպումը, որը գումարվելու էր նոյեմբերի վերջին, սակայն, այն տեղի չունեցավ։ Թե ինչո՞ւ, «Առավոտին» պարզաբանում է ԵԽ ԽՎ-ում հայկական խորհրդարանական պատվիրակության ղեկավար Արմեն Մարտիրոսյանը։
– Հերթական անգամ ադրբեջանական կողմն առաջ էր քաշել ինչ-որ կազմակերպական խնդիրներ քննարկելու անհրաժեշտության հարցը։ Մեր կարծիքն այն է, որ նույն հարցի կազմակերպման շուրջ չորս անգամ քննարկում անցկացնելը նպատակահարմար չէ։ Ուստի՝ Հայաստանի պատվիրակությունը պատրաստեց հայտարարության մի տեքստ եւ ուղարկեց Եվրոպայի խորհուրդ։ Այնտեղ ասված է. կարեւորելով ԵԽ շրջանակներում տեղի ունեցող բոլոր գործընթացները, միաժամանակ փաստում ենք, որ, մեր կարծիքով, միանգամայն անընդունելի է, Եվրոպայի խորհրդի որեւէ երկրի քմահաճույքներին ենթարկվելը։ Տեղեկություններ ունենք, որ մեր հայտարարությունը դրական արձագանքի է արժանացել։ Ուստի բուդապեշտյան որոշումը հետեւյալն է. անկախ նրանից՝ Ադրբեջանը մասնակցելու է դեկտեմբերի 16-ին ԵԽ շրջանակներում նախատեսված լսումներին, թե՝ ոչ, Հայաստանի եւ Ղարաբաղի պատվիրակությունները կարող են գնալ Փարիզ, որպեսզի այնտեղ տեղի ունենան քննարկումներ։
Ա. Զ.
