Վարչապետ Արմեն Դարբինյանը ոչ լեգիտիմության մթնոլորտ ստեղծողների եւ ՍՊԻԴ-ի դեմ բարեհաջող պայքարելուց զատ, երեկ անկեղծորեն զարմացավ նաեւ կեղծ օղիների գոյության փաստից. «Թունավորում են, ախր, ժողովրդին, չէ՞։ Թույն է, չէ՞։ Որակի վերահսկողություն չկա։ Խանութից օղի են գնում մարդիկ, չգիտեն՝ կթունավորվե՞ն, թե՞ ինչ կլինի»։ Ու թեեւ օղին եւս, կոնյակի նման, ազգային արժեք չէ, սակայն վարչապետն իր խոսքը եզրափակեց այսպես. «Պետական ամենալուրջ խնդիրներից մեկն է սա այսօր»։
ՀԱԿԱՏԱՆԿԱՅԻՆ ԾԱՂԿԱՆՈՑՆԵՐ
Անցյալ շաբաթավերջին ավարտին հասցվեցին ամերիկյան դեսպանատան առջեւ ընթացող պաշտպանական բնույթի շինարարական աշխատանքները։ Դեսպանատան ամբողջ ճակատով մեկ վեր են խոյացել բետոնապատ՝ 1 մ բարձրությամբ 2 մ երկարությամբ ծաղկանոցներ։ Հիշեցնենք, որ դա տեղի է ունեցել ընթացիկ տարում ամերիկյան երկու դեսպանատների վրա կատարված ահաբեկչական գործողությունների արդյունքում ընդունված որոշման հիման վրա։ Իսկ Երեւանում արդեն անցնող-դարձողը նոր շինված այդ թմբերի համար անուն է սահմանել՝ հակատանկային ծաղկանոցներ։
ՔԽ-Ը՝ ՄԻՆՉԵՎ ԸՆՏՐՈՒԹՅՈՒՆՆԵՐ
Կարդացեք նաև
Նախագահի աշխատակազմին մերձ աղբյուրներն «Առավոտին» տեղեկացրին, որ Քաղաքական խորհուրդը, հավանաբար, կլուծարվի։ Սակայն դա օրերի խնդիր չէ։ Այդ քողարկված նպատակը գործի կվերածվի միայն խորհրդարանական ընտրություններից հետո։
ԱՐՏԱՀԵՐԹ ՇՐՋԱՊՏՈՒՅՏ
Էդվարդ Եգորյանի գլխավորած «Հայրենիք» պատգամավորական խմբի նախաձեռնությամբ տեղի կունենա արտահերթ նիստ՝ «էլեկտրաէներգիայի սակագնի մասին» օրակարգով։ Նախատեսվում է, որ մինչեւ համապատասխան օրենքի ընդունումը Հայաստանում գործելու են առ 1998 թվականի նոյեմբերի 1-ը ուժի մեջ եղած էլեկտրաէներգիայի սակագները։
