Երեւանի քաղաքապետ պրն Ս. Աբրահամյանին
պատճենը՝ քաղաքապետարանի կրթության վարչության պետ տիկին Ս. Խրիմյանին,
քաղաքապետարանի վերահսկողության վարչության պետ պրն Գ. Գեւորգյանին
Հայտնում եմ ձեզ, որ 1998 թ. մարտ ամսից մինչեւ օգոստոս ամիսը ներառյալ, թիվ 61 դպրոցում անցկացվել են ստուգումներ քաղաքապետարանի իրավաբանական վարչության, քաղաքապետարանի կրթության վարչության եւ Նորք-Մարաշ թաղապետարանի համատեղ հանձնաժողովի կողմից, այնուհետեւ ստուգումներ են անցկացրել ՀՀ ֆինանսների եւ էկոնոմիկայի նախարարության ֆինանսական վերահսկողության գլխավոր վարչությունը, Հայաստանի հանրապետական դատախազությունը եւ Երեւանի Մյասնիկյանի տարածքային դատախազությունը։ Արդյունքում, օգոստոս ամսին, Մյասնիկյանի տարածքային դատախազությունից գրավոր տեղեկացվել եմ, որ մեր դպրոցի «գործունեության վերաբերյալ նախապատրաստված նյութերով քր. գործի հարուցումը մերժվել է հանցակազմի բացակայության պատճառով» (պատճենը հանձնված է կրթության վարչության պետ տիկին Ս. Խրիմյանին)։
Կարդացեք նաև
Այսքանից հետո, առավել քան զարմանալի ու տարօրինակ է, որ «Երեւանի թիվ 88 դպրոցում ֆինանսատնտեսական եւ հաշվապահական հաշվառման բնագավառում հայտնաբերված խախտումների կապակցությամբ «….», Երեւանի մյուս դպրոցներում նմանօրինակ խախտումները բացառելու համար», այս անգամ որոշվել է… թիվ 61 դպրոցում «ուսումնասիրություններ կատարել»։ Ի՞նչ եք կարծում, մանրակրկիտ ու պերմանենտ ստուգումների եւ ուսումնասիրությունների, թաղապետարանի կողմից ոտնձգությունների այս մթնոլորտում ինչպե՞ս է ընթանում դասապրոցեսը, ինչքա՞ն կդիմանան փաստացի աշխատանքի համար փաստորեն չվճարվող, առանց այն էլ անուշադրության մատնված ուսուցիչները, ինչպե՞ս են զգում իրենց ոչ մի մեղք չգործած աշակերտները։
Ելնելով վերոնշյալից եւ ՀՀ վարչապետ Արմեն Դարբինյանի՝ օրերս արած հայտարարությունից այն մասին, որ բոլոր մեթոդներով պայքարելու է ՀՀ նախագահի լեգիտիմությունը չճանաչող անհատների, կուսակցությունների եւ կազմակերպությունների դեմ, ինձ մնում է ավելացնել, որ խնդրո առարկան ոչ թե 61 դպրոցի գործունեությունն է, այլ դպրոցի տնօրենի անձը, որը, այո՛, 1998 թ. ՀՀ նախագահի արտահերթ ընտրություններում ղեկավարել է ՀՀ նախագահի թեկնածու Աշոտ Բլեյանի նախընտրական շտաբը եւ «Նոր ուղի» կուսակցության վարչության անդամ է։
Հարգանոք՝ ԳԵՈՐԳԻ ՎԱՆՅԱՆ
Երեւանի թիվ 61 միջնակարգ դպրոցի տնօրեն
