Նոյեմբերի 17-ին եւ 18-ին ԱԺՄ-ի, «Ժողովրդավարական հայրենիք», «Մտավորական Հայաստան» կուսակցությունների, ՀՀՇ-ի, ՀԺԿ-ի, «Շամիրամի», «21-րդ դար. ԺԱԿ»-ի, ՌԱ(ԼԴ)Կ-ի, ԻՄ-ի, ՔԴՄ-ի ներկայացուցիչները քով-քովի գալով, ժամեր տեւած քննարկումներից հետո (իսկ ժամեր տեւելը շատ բնական է, քանի որ կուսակցությունները մասնակցում էին նվազագույնը 2 անդամով, իսկ քաղաքական ճառ ասող հայը ամենապակասը պետք է մի 5 րոպե խոսի) ընդունել են հայտարարություն՝ հետեւյալ տեքստով. «Ազգային ժողովում ներկայացված կուսակցությունների՝ ժողովրդավարություն, մասնավորապես ազատ եւ արդար ընտրություններ ապահովող օրենսգիրք ընդունելու փորձը ձախողվեց հիմնականում ապաքաղաքական մեծամասնության կողմից։
Առաջին ընթերցմամբ, ի դեպ, «Ազգային ժողովի կանոնակարգ» օրենքի խախտմամբ, ընդունված «երկրապահական» օրենսգիրքը հնարավորություն է տալիս իշխանությանը կեղծիքների միջոցով ձեւավորելու իրեն հարմար Ազգային ժողով»։ Արձանագրելով ստեղծված իրավիճակը, հայտարարությունը ստորագրած կուսակցությունները պնդում են, որ ժամանակավորապես ստորադասելով իրենց քաղաքական տարաձայնությունները, շարունակելու են պայքարը հանուն ժողովրդավարության հաստատման։ Այս տեքստը, որ երկարատեւ քննարկումներից հետո բաժանվեց լրագրողներին, ըստ երեւույթին, չի արտահայտում կրքերի այն շիկացածությունը, որի երկունքն է։
Կուսակցությունները, հավանաբար, չեն համաձայնել որոշակի ձեւակերպումների հարցում, որովհետեւ հայտարարության նախնական տարբերակից որոշ գաղափարներ հանված են։ Քչախոս էին նաեւ փակ դռների հետեւում տեղի ունեցող բանակցությունների մասնակիցները։ Լրագրողներին գրեթե տեղեկատվություն չէր հաղորդվում։ Պարզապես խոսվում էր, թե մեկը առաջարկել է ազգային-ազատագրական պայքար սկսել, մյուսն ավելի նպատակահարմար է համարում խորհրդարանում մանդատները վայր դնելը, իսկ երրորդը՝ քաղաքական ամբիոնը խորհրդարանից Թատերական հրապարակ տեղափոխելու կոչ է արել եւ այսպես շարունակ։ Բացատրություններ տալու հարցում էլ նիստի մասնակիցները շռայլ չէին։
Ինչեւիցե, «Առավոտին» հաջողվեց ձեռք բերել նաեւ այն հայտարարության սեւագիրը, որը կարող է հաջորդել իբրեւ վերոնշյալ կուսակցությունների հաջորդ քայլ։ Այնտեղ եւս արձանագրվում է, որ, առաջնորդվելով ժողովրդի հանդեպ ունեցած պատասխանատվության զգացումով, ձգտելով մինչեւ վերջ օգտագործել առողջ բանականության վրա խարսխված փոխհամաձայնության գալու հնարավորությունը, «մենք՝ ԱԺ-ում ներկայացված ընտրական օրենսգրքի ընդհանրական (միասնական) նախագծի կողմնակից կազմակերպություններս, մեր սկզբունքային (իշխանությունը պատկանում է ժողովրդին) դիրքորոշմանը մեր հավատարմությունը հավաստող ավելի վճռական գործողությունների անցնելուց առաջ ներկայացնում ենք առկա վիճահարույց 4 հիմնական հարցերի լուծման հետեւյալ համալիր մոտեցումը»։ (Տե՛ս նկարը)։ Կուսակցությունների հաջորդ հավաքը տեղի կունենա երկուշաբթի։
Կարդացեք նաև
Ա. Զ.
