ԼՂՀ՝ Ադրբեջան ավտոնոմիայով ՀՀ նախկին արտգործնախարար, ՀՀՇ Երեւանի կազմակերպության նախագահ Ալեքսանդր Արզումանյանի մեկնաբանությունը ԵԱՀԿ Մինսկի խմբի համանախագահների նոր առաջարկությունների վերաբերյալ.
-Նախ ասեմ, որ ԵԱՀԿ Մինսկի խմբի համանախագահների առաջարկների մասին խոսելն առայժմ վաղ է, քանի որ մենք դեռ ծանոթ չենք դրանց բովանդակությանը։ Դա ցույց կտա բանակցությունների ընթացքը։ Ինչ վերաբերում է common state կամ ընդհանուր պետություն գաղափարին, իմ կարծիքով, դա բառախաղ է՝ անհասկանալի տերմիններով։ Պատմության մեջ նման նախադեպ մենք գիտենք։ 1918 թվականին ստեղծվել է Հարավսլավիան՝ հարավային սլավոնների ընդհանուր պետությունը, որում միավորվեցին սերբերը, խորվաթները եւ սլովենները։ Այդ պետությունը տրոհվեց եւ գիտենք, թե ինչ ստացվեց դրանից։
Իմ խորին համոզմամբ, եթե նախկին իշխանություններին քննադատում էին Ղարաբաղը ծախելու կամ այն Ադրբեջանի կազմում թողնելու մեղադրանքով, ապա ընդհանուր պետություն հասկացությունը մեր արածից մեկ քայլ առաջ կարող ենք համարել միայն այն դեպքում, եթե այդ ընդհանուր պետությունը կոչվի Լեռնային Ղարաբաղի Հանրապետություն, իսկ Ադրբեջանը նրա կազմում լայն ինքնավարություն ստանա։ Դա կլինի հաղթական արտաքին քաղաքականություն, ի տարբերություն մեր պարտվողականի։ Իսկ մյուս կուսակցությունների տեսակետները common state-ի վերաբերյալ կներկայացնենք «Առավոտի» հաջորդ համարում։
Ա. Զ.
