ԱՄՆ կոնգրեսական Կարլ Լեւինը երեկ լրագրողների հետ կայացած կարճատեւ զրույցի ժամանակ ասաց, որ Հայաստանում ունեցել է «հետաքրքիր եւ լավ» հանդիպումներ եւ որ մտադիր է այցելելու նաեւ այնպիսի վայրեր, որոնց մասին միշտ երազել է։ Նա տեղեկացրեց, որ Միչիգանում՝ իր կյանքի ընթացքում մշտապես շփվել է հայկական համայնքի հետ եւ համագործակցել է կոնգրեսում Հայաստանի համար կարեւորություն ունեցող հարցերի շուրջ։ Թե նախագահի, թե վարչապետի հետ հանդիպումների ժամանակ քննարկվել են տարածաշրջանային ինտեգրացման հետ կապված հարցեր։
Կարլ Լեւինի վրա մեծ տպավորություն է թողել «ՀՀ նախագահի նվիրվածությունը տարածաշրջանային ինտեգրացման զարգացման նպատակներին»։ Նա ասաց նաեւ, որ Կոնգրեսի 20 տարվա իր փորձից գիտի, որ տարածաշրջանում տնտեսական ինտեգրացման հետ կապված որոշումները «ժամանակ առ ժամանակ դժվար են լինում քաղաքական տեսակետից, բայց ես նույնպես տեսել եմ, որ այդ որոշումները բավականին արդյունավետ են»։ Այնուհանդերձ, Կ. Լեւինը դրական զգացումներով է հեռանում Հայաստանից։ Ընդսմին գնահատելով «որոշակի առաջընթացը», որ առկա է ժողովրդավարական զարգացումներում եւ տնտեսական ոլորտների բարեփոխումներում։
ՌՈՒԶԱՆ ՄԻՆԱՍՅԱՆ
Հ.Գ. Դեսպանի հետ նրանք հրավիրվել էին մասնակցելու երկրաշարժի 10-ամյակին նվիրված համերգին, ուր, ինչպես տեղեկացրեց Կ. Լեւինը. «Կնշվի այն օգնությունը, որը տրամադրվել է միջազգային համայնքի, տարբեր երկրների, այդ թվում Միացյալ Նահանգների կողմից»։
