Միամիտ չլինեն միասնականները, երկրապահները կթողնե՞ն, որ նրանց հայտարարությունից հետո ժամանակ անցնի, եւ մամուլը, ժողովուրդը մի ամբողջ 3 օր դրա ազդեցության տակ մնան։ Անմիջապես էստաֆետն ընդունեցին եւ իրենց հերթին հայտարարեցին, որ ընտրական օրենսգրքի շուրջ քննարկումներն անարդյունք են։ Ալբերտ Բազեյանն էլ ներկայացրեց առաջարկների ու մերժումների պատմությունը։
Բանավեճի հիմնական թեման եղել է ընտրական հանձնաժողովների ձեւավորման մեխանիզմը։ Իրենք միասնականների առաջարկները մերժել են, քանի որ դրանցով չէր ապահովվելու բոլոր, նաեւ ԱԺ-ից դուրս գտնվող քաղաքական ուժերի ընդգրկումը հանձնաժողովներում, եւ «դեմ են արհեստական մոտեցումներին»։ Բացի այդ, նրանք չեն գտնում, որ միասնական տարբերակը Հայաստանի ամբողջ քաղաքական դաշտն է ներկայացնում, քանի որ այդ 11 կուսակցություններին չեն միացել ավանդականները։ Բարեփոխող Արմեն Մարտիրոսյանն էլ հիացած էր այն մթնոլորտով, որ, ի տարբերություն նախորդ ընտրական օրենսգրքի շուրջ քննարկումների, «այսօր ձեւավորվել է»։ Իմացած լինեք՝ «իշխանությո՛ւնը կարողացավ ստեղծել այդ մթնոլորտը»։
Համենայնդեպս, երկրապահները ցավում են, որ բանակցություններն ընդհատվեցին, իրենք դեռ պատրաստ են դրանք շարունակել, իսկ իրենց «դռները դեռ փակ չեն»։ Նրանք դեռ իրենց ընդդիմախոսներին կփորձեն ընդառաջ գնալ։ «Քաղաքական սուր իրավիճակների առիթ չկա»,- հավատացնում է պրն Բազեյանը։ Լրագրողներից մեկի այն հարցին, թե ինչու մամուլին թույլ չտրվեց ներկա լինելու այդ քննարկումներին, որպեսզի երեկվա ասուլիսի կարիքն էլ չլիներ (բացի այդ, ավելի հեշտ կլիներ փոխադարձ մեղադրանքների հավաստիությունը պարզել), պրն Բազեյանն ասաց, որ նպատակահարմար չէր։ «Ի վերջո, դա տպվելու է թերթերում»։ Իբր հիմա չի տպվում։
Ա. ԳՐԻԳՈՐՅԱՆ
