Մեկ շաբաթ առաջ հանրապետության նախագահ Ռոբերտ Քոչարյանը քաղաքապետի եւ մի քանի այլ պաշտոնյաների հետ այցելել էր Դավթաշենի կամուրջ եւ ամերիկահայ գործարար Վահագ Հովնանյանի կառուցելիք «Կանաչ քաղաք»։ Ձեր թերթում այդ այցի մասին պատմող հոդվածում գրված էր, որ ամերիկահայ գործարարը այդ քաղաքի տարածքում կառուցվելիք առաջին տունը խոստացել Է նվիրել հանրապետության նախագահին։ Ես հիշում եմ, որ մի քանի տարի առաջ Գերագույն խորհրդում քննարկվում էր պետական պաշտոնատար անձանց ստացած նվերների հարցը։
Ինչպես բոլոր օրենքների քննարկման ժամանակ, այդ դեպքում էլ, մեր խորհրդարանականները մատնանշում էին քաղաքակիրթ երկրների օրենսդրությունը։ Որքան հիշում եմ, ընդունված օրենքի համաձայն, պետական պաշտոնյան պարտավորվում էր իր աշխատավարձից բարձր արժեք ունեցող նվերները հանձնել պետությանը։ Ճիշտ ու ճիշտ քաղաքակիրթ արտասահմանի նման։ Հիշում եմ, որ քննարկումների ժամանակ նշվում էր, որ բրիտանական պաշտոնյան պետությանն է հանձնում 50 դոլարից ավել արժեցող նվերը։ Սակայն ոչ ձեր թերթը, ոչ որեւէ այլ թերթ, այս հարցը չքննարկեց նվիրվող տան պարագայում։ Հնարավոր է, որ իմ մատնանշած օրենքը հետագայում փոխվել է։ Բոլոր դեպքերում կցանկանայինք, որ «Առավոտը» գրեր այդ մասին։
Հարգանքներով՝ Ա. ԺԱՄԿՈՉՅԱՆ,
թոշակառու
