ՀՅԴ Գերագույն մարմնի նախաձեռնությամբ երեկ ԵՊՀ-ում սկսվեց եւ ավարտվեց գիտաժողով՝ «ՀՀ տնտեսության եւ ձեռնարկատիրության արդի խնդիրները» թեմայով։ Քննարկվող հարցերից ամենահետաքրքիրը էլեկտրաէներգիայի սակագնի թանկացման հարցն էր։ Ինչպես հայտնի է, ԳիԱրՔՄի-ի կուսակցությունը բազմիցս թե՛ էներգետիկ հանձնաժողովին, թե՛ կառավարությանն է ներկայացրել ծրագիր, որով պատճառաբանված առաջարկում էր անգամ իջեցնել էլեկտրաէներգիայի սակագինը։
Կուսակցության նախագահ Ալեքսանդր Աղամալյանն իր ելույթում նշեց, որ Էներգետիկ հանձնաժողովի անդամները կուլիսներում իրենք էլ են խոստովանում թանկացման անհեթեթությունը, իսկ հեռուստատեսությամբ լրիվ հակառակն են պնդում։ Չգիտես ինչու պրն Աղամալյանը համոզված է, որ նախագահ Քոչարյանը լավ չէ իրազեկված այս խնդրի մասին։ Սակայն ՔԽ-ի գործադիր քարտուղար Հրանտ Խաչատրյանի հետ զրուցելիս ճշտեցի, որ ՔԽ-ն իր եզրակացությունն արդեն դրել է նախագահի սեղանին, եւ նախագահը պիտի որ այն կարդացած լինի։ Եթե նախագահը ՔԽ-ի խորհուրդը՝ չբարձրացնել սակագները, չլսի, որքան հասկացա, ՔԽ-ն առանձնապես իրեն վատ չի զգա եւ կշարունակի ՀՀ նախագահին խորհուրդներ տալու իր անշնորհակալ ու ինչ-որ տեղ էլ սիզիֆյան գործը։
Լ. ԱՎԱԳՅԱՆ
