Մինչ այժմ՝ նախնական ու բանավո՞ր արձագանքներ
Օգոստոսի 26-ին հրավիրված ասուլիսում Պարույր Հայրիկյանը հայտարարել էր, թե հասարակությանը հայտնի կուսակցությունների հետ Սահմանադիր ժողովի միջոցով նոր Սահմանադրություն ստեղծելու նախապատրաստական աշխատանքներ են սկսում։ Նաեւ խոստացել էր, որ առաջիկա 10 օրում այդ մասին ընդհանրական հայտարարագիր եւ նախաձեռնողների մամուլի ասուլիս է լինելու։
Երկու ամսից ավելի է անցել, սակայն ոչ նման հայտարարագիր է հրապարակվել, ոչ էլ ասուլիս է հրավիրվել։ Պատճառները պարզելու համար դիմեցինք նախագահի խորհրդական, Ինքնորոշում միավորման նախագահ Պարույր Հայրիկյանին. «ԻՄ-ը հայտարարություն արեց Սահմանադրական դաշինք ստեղծելու մասին, նամակներ ուղղեց բոլոր կազմակերպություններին՝ բոլոր նրանց, ովքեր շահագրգռված են Սահմանադրությունն արմատապես բարեփոխելու հարցում։ Մենք կոչ արեցինք համատեղ աշխատել՝ ժամանակացույց մշակելու եւ այդ ուղղությամբ աշխատանքների համակարգը պատկերացնելու համար։ Բոլորն էլ արձագանքեցին։ Մեր ժամանակացույցը բավական մեծ ժամանակահատված է ընդգրկում՝ շուրջ 1,5-2 տարի։ Եվ նախնական, բանավոր արձագանքը դա է եղել։
Դրանից հետո սահմանադրական փոփոխություններ նախապատրաստող հանձնաժողովում գոնե սպառվեց այն մոտեցումը, թե նոր Սահմանադրություն ստեղծելն ավելի սկզբունքային է, քան ներկա Սահմանադրությունը բարեփոխելը։ Այս մոտեցումը բացասաբար էր անդրադառնում աշխատանքների ոգու վրա։ Մեր այդ քայլով ցույց տվեցինք, որ դրանք իրար չեն հակասում, ու նոր Սահմանադրություն ստեղծելու գաղափարը կարող է համատեղվել հինը բարեփոխելու աշխատանքների հետ։ Եվ եթե մենք առկա Սահմանադրությունը բարեփոխելուն մասնակցում եւ գլխավորում ենք՝ դա չի նշանակում, թե անընդունելի ենք համարում նորը ստեղծելու նախաձեռնությունները»։ Հավելենք, որ ինչպես եւ 2 ամիս առաջ հրավիրված մամուլի ասուլիսում էր, այս զրույցի ընթացքում եւս Պարույր Հայրիկյանը չասաց, թե որ կազմակերպությունների հետ են նախաձեռնել նոր Սահմանադրության ստեղծման գործընթացը։
Կարդացեք նաև
Ա. Ի.
