Իսկ ԱԺ պատգամավոր Հովհաննես Իգիթյանի հետ՝ ավիատոմսերից ու դրանց արժեքից
Հոկտեմբերի 23-24-ը Վարշավայում կկայանա եվրոպական երկրների, ՆԱՏՕ-ի, հյուսիսատլանտյան երկրների խորհրդարանական արտաքին հարաբերությունների հանձնաժողովների նախագահների կոնֆերանս։ Հայաստանից մասնակցելու է վերոնշյալ հանձնաժողովի նախագահը, այսինքն՝ Հովհաննես Իգիթյանը։ Պարոն Իգիթյանը այս կոնֆերանսին մասնակցում է առանց հետեւանքների մասին մտածելու, քանի որ, իր իսկ ասելով, արդեն իմունիտետ ունի, պատվաստներ է ստացել։ Պատվիրակությունը բաղկացած է միայն պարոն Իգիթյանից, այնպես որ, մենք էլ ենք հանգիստ, որ վերադարձից հետո պրն Իգիթյանն ինքն իր խստություններից կամ ինքն իրեն խաբելուց չի բողոքի։ Պատվիրակը, սակայն, դժգոհ է, որովհետեւ Վարշավայում պետք է համատեղի նաեւ թարգմանչի եւ քարտուղարի պարտականությունները (երկուսն էլ՝ անվճար)։
-Որքա՞ն գումար է ձեզ հատկացվում եւ, ներեցեք, ի՞նչ արժե տոմսը։
-Շա՜տ մեծ գումար է. օրապահիկը Լեհաստանում 18 դոլար է, իսկ Մոսկվայում՝ 1,5 դոլար։ Տոմսի արժեքը (այնտեղ եւ հետ) 500 դոլար է։
Կարդացեք նաև
-Որեւէ ասելիքո՞վ եք մասնակցելու կոնֆերանսին, թե՞, պարզապես, դիտորդի կարգավիճակով։
-Կոնֆերանսի ուղղվածությունը կոնֆլիկտների վերացումն է, դրանց խաղաղ լուծումը։
-Ղարաբաղի՞, թե…
-Ե՛վ աշխարհի, ե՛ւ Ղարաբաղի։ Եվ մենք մեր տեսակետը պետք է հայտնենք։
-Իսկ ո՞րն է ձեր տեսակետը։
-Ես առիթ ունեցել եմ ԵԱՀԿ նիստերի ժամանակ առաջարկներ անելու։ Դրանց մի մասն ընդունվել է, այն է՝ ցանկացած կոնֆլիկտ պետք է լուծվի՝ օգտագործելով չորս էտապ։ Նախ՝ ԵԱՀԿ-ն բոլոր միջոցները պետք է գործադրի, որ խաղաղություն հաստատվի։ Սա հնարավոր է։ Երկրորդ՝ պետք է հայտնաբերվեն կոնֆլիկտի հիմնական կողմերը, եւ նրանք նստեն բանակցությունների սեղանի շուրջ։ Երրորդ՝ ԵԱՀԿ-ն պետք է այդ քաղաքական համաձայնության դիտորդը լինի, եւ չորրորդ՝ ԵԱՀԿ-ն իր վրա պետք է վերցնի ստուգողի դերը այդ համաձայնագրում։ Այսինքն՝ հետեւի կողմերի՝ իրենց վրա վերցրած պարտականությունների կատարմանը։
Երեւի թե հաջորդ հարցս տակտով աչքի չէր ընկնում, բայց, այնուամենայնիվ.
-Պարոն Իգիթյան, ո՞վ է վճարելու ձեր այցելության գինը։
-Խոսրով Հարությունյանը՝ իր ֆոնդից։ Այո՛, այո՛, ֆոնդում ահագին փող կա։ Ահագին։ Չորս դպրոցի վերանորոգման փող։
-Պարարվեստի ուսումնարանն էլ,- վրա բերեց ներկա պատգամավորներից մեկը։
-Նաեւ՝ Մեծ թատրոնի,- արդեն երեւի թե կատակեց պրն Իգիթյանը։
Ամեն դեպքում, Հովհաննես Իգիթյանին բարի վերադարձ մաղթեցի։
ԼԻԼԻԹ ԱՎԱԳՅԱՆ
