Սերգեյ Բադալյանն ասուլիսում հայտարարել էր, որ Ռուսաստանի հետ համերաշխության հանրահավաքը անցկացնելու է ինչպես Հայկոմկուսը, այնպես էլ ժողովրդա-հայրենասիրական ուժերի միությունը։ Վերջինիս մաս կազմող «Հայկանդուխտ» ավանդապաշտական-ժողովրդավարական կուսակցության նախագահ Արմենուհի Ղազարյանը, սակայն, հանրահավաքի ունկնդիրների մեջ էր եւ «Առավոտին» հայտնեց. «Ինձ ելույթի համար ձայն չտվեցին»։ Միության որեւէ այլ ներկայացուցիչ էլ չխոսեց։
ՊԱՏԳԱՄԱՎՈՐՆԵՐՆ ԱՅՍՈՒՀԵՏ ՇՐՋԱՀԱՅԱ՞Ց ԿԼԻՆԵՆ ՀԱՅՀՈՅԵԼԻՍ
Նկատի առնելով, որ Հայաստանի ազգային հեռուստաընկերության տնօրեն Տիգրան Նաղդալյանի հասցեին «Հայրենիք» խմբի անդամ Պետրոս Մաքեյանի վիրավորանքները խորհրդարանի համապատասխան գնահատականին չէին արժանացել՝ ՀԱՀ-ը երեկ չլուսաբանեց ԱԺ արտահերթ նիստի աշխատանքը։ Տիգրան Նաղդալյանն «Առավոտին» պարզաբանեց, որ ԱԺ աշխատանքների լուսաբանումը շարունակվելու է. «Չենք կարող հեռուստադիտողին տեղեկատվությունից զրկել»։ Բողոքի այս գործողությունը վերաբերել էր միայն այն նիստին, որի ընթացքում որակումներ էին հնչել։
ԱՆԿԵՂԾՈՒԹՅԱՆ ԵՎ ՀԻԱՍԹԱՓՈՒԹՅԱՆ ՄԱՍԻՆ
Կարդացեք նաև
«Պրիմիտիվ եւ հիշաչար համեմատություն է։ Հուսով եմ, որ Վազգեն Մանուկյանն անկեղծ չէ, եւ սա քաղաքական ինչ-որ քայլ է։ Այլապես հիասթափեցնող է, եթե այս ամենն անկեղծ է ասված»,- այսպես էր մեկնաբանել նախագահի աշխատակազմի ղեկավար Ալեքսան Հարությունյանը ԱԺՄ նախագահ Վազգեն Մանուկյանի՝ հանրահավաքում արված հայտարարությունը Լեւոն Տեր-Պետրոսյանի եւ Ռոբերտ Քոչարյանի իշխանության ոճերի նույնականության վերաբերյալ։ Նշենք, որ ժամանակին Վազգեն Մանուկյանը եւս որոշակի դեր է ունեցել Ալեքսան Հարությունյանի պաշտոնական առաջխաղացումներում։
