Կոմունիստների վերջին շրջանի հրապարակային գրեթե բոլոր ելույթները անձնական վիրավորանքներ են պարունակել Պարույր Հայրիկյանի հասցեին։ Բացառություն չէր նաեւ Սերգեյ Բադալյանի երեկվա ասուլիսը։
Նա Հայրիկյանին մեղադրեց «խելագարության հասնող ձեւակերպումներ անելու» եւ «արատավոր քաղաքականության ձայնափող» դառնալու մեջ։ Հետո էլ նշեց. «Պարույր Հայրիկյանները հոգեկան խանգարման հասնող ջանասիրությամբ են գաղափար տարածում»։ Եվ էլի. «Չարաչար սխալվում են պրն հայրիկյանները՝ ոչ հայրենիք ունեն, ոչ ազգի տեր են։ Միայն հորջորջում են եւ առիթ են օգտագործում, որ հայհոյանքներ տածելով ինչ-որ մի տեղ նորից, ուրեմն, ջրի երեսին գան։ Միայն դա է նրանց նպատակը, ուրիշ նպատակ չկա։ Սպեկուլյացիա է քաղաքական էստեղ միայն, որովհետեւ ժողովուրդը շատ լավ գիտի՝ ով ինչպիսի բարոյականություն ունի, մասնավորապես այդ անձը նույնպես»։ Եվ չնայած կրկին նշեց, որ «սատանայի հետ էլ կհամագործակցենք, եթե դա բխում է մեր ժողովրդի շահերից», բայց քիչ հետո վերապահում կատարեց. «Պարույր Հայրիկյանի հետ չենք համագործակցի, որովհետեւ էդտեղ էդ համընկնումը չկա»։
Նախագահի խորհրդական պրն Հայրիկյանին առաջարկում ենք այս որակումների համար պատասխան պահանջել անմիջականորեն Սերգեյ Բադալյանից, այլ ոչ թե լրագրողներից, որոնք տվյալ դեպքում բառացի արձանագրողներ են։ Ի դեպ, վիրավորական արտահայտություններ հնչեցին նաեւ Հրանտ Բագրատյանի հասցեին։
Ա. Ի.
