Պատասխանելով «Առավոտ»-ի հարցին, թե ինչպե՞ս է վերաբերվում Եվգենի Պրիմակովի՝ Ռուսաստանի վարչապետ դառնալուն, ՀՀ պաշտպանության նախարար Վազգեն Սարգսյանը համառոտ պատասխան տվեց. «Դրական»։ Այս եւ հրատապ այլ հարցերի շուրջ պաշտպանության նախարարի տեսակետների մասին կարող եք կարդալ 2-րդ էջում։
ԱՀԱԳԻՆ ՄԱՐԴՈՒ ՎՐԱ
ԱԺ պետաիրավական հանձնաժողովի նախագահ Արթուր Բաղդասարյանը «Առավոտին» հայտնեց, որ սեպտեմբերի 15-ին խորհրդարանն, ըստ երեւույթին, քննության կառնի հանրապետության նախագահի առաջարկությունը, որով նախատեսվում է համաներում անցկացնել։ Ա. Բաղդասարյանն ասաց նաեւ, որ այն «ահագին մարդու վրա է տարածվելու, ավելի շատ մարդու, քան անցյալ ամնիստիան»։
ՃԱՆԱՊԱՐՀ ԴԵՊԻ ՍԴ ԱԺ
Կարդացեք նաև
8-րդ նստաշրջանի առաջին իսկ օրվանից պատգամավորները սկսել են ստորագրություններ հավաքել Կոնյակի գործարանի հարցով Սահմանադրական դատարան դիմելու համար։ Նրանց կարծիքով հանրապետության նախագահը կոպտորեն խախտել է օրենքը, չհարգելով շուրջ 6,5 տասնյակ պատգամավորների դիմումը՝ հրավիրել արտահերթ նստաշրջան։ Խորհրդարանական օրվա ավարտին արդեն իսկ հավաքված էր շուրջ 4 տասնյակ ստորագրություն, սակայն հարցը ՍԴ մտցնելու համար հարկավոր է պատգամավորների ձայների 1/3-ը՝ 64 ձայն։
ՀԺԿ-Ի ԲՆԱԿԱՐԱՆԱՄՈՒՏԸ
Կարեն Դեմիրճյանի գլխավորած Հայաստանի ժողովրդական կուսակցությունը «բնակարանամուտ» է տոնում։ ՀԺԿ-ի գրասենյակը Սարյան փողոցում է՝ Կենտրոնական ընտրական հանձնաժողովի մոտակայքում։ Սեպտեմբերի 14-ին ՀԺԿ-ի գրասենյակում կատարվում էին կահավորման աշխատանքներ։
