Կոնյակի գործարանը սեփականաշնորհման ցանկից հանելու պատգամավորական նախաձեռնող խումբը հայտարարել էր, թե նախ պիտի 4 հոգով (Սադոյան, Սարգսյան, Խաչատրյան, Եգորյան) ՍԴ-ին դիմեն այս վաճառքի օրինականության վերաբերյալ մասնավոր հարցադրմամբ, իսկ հետո արդեն ԱԺ-ի 1/3-ով։ Նախաձեռնող խմբից հետաքրքրվեցինք, թե ի՞նչ փուլում է այս խնդիրը եւ պարզվեց, որ նրանց ոչ պաշտոնապես «հասկացրել» են, որ ՍԴ չեն կարող 4 հոգի դիմել, այլ միայն ԱԺ-ի 1/3-ը, այլապես սահմանադրական մեկնաբանություն չեն կարող ստանալ։ Նախաձեռնող խումբն էլ որոշել է սպասել ԱԺ-ի արձակուրդների ավարտին՝ 1/3-ի ստորագրություններ հավաքելու եւ պաշտոնապես դիմելու համար։
ՄԻԱԿՆ ՈՒ ԱՆՓՈԽԱՐԻՆԵԼԻՆ
ՀՀ նախագահին առընթեր մարդու իրավունքների հանձնաժողովն իր վերջին նիստերից մեկում, որը նախագահում էր Պարույր Հայրիկյանը, քննարկել է ՄԱԿ-ի մարդու իրավունքների պաշտպանության համար ամենամյա մրցանակաբաշխությանը թեկնածու ներկայացնելու հարցը։ Երկար բանավեճերից ու որոնումներից հետո հանձնաժողովը միահամուռ եկել է այն եզրակացության, որ մոլորակի վրա իրավապաշտպանության գործում չկա առավել նշանակալի ավանդ ունեցող գործիչ, քան Պարույր Հայրիկյանն է։ Հենց նրա անունն էլ Հայաստանի կողմից կներկայացվի ՄԱԿ-ին։
