«Նախկինների համեմատ» լուրի («Առավոտ» 5 օգոստոսի, էջ 2) կապակցությամբ երեկ խմբագրություն զանգահարեց ԱԺ փոխխոսնակ Ալբերտ Բազեյանը եւ հայտնեց, որ ԱԺ նախագահի տեղակալներից յուրաքանչյուրն ունի 1-ական խորհրդական, օգնական եւ գործավարուհի, եւ ոչ թե 6-ական խորհրդականներ ու օգնականներ, ինչպես մեր թղթակցին հայտնել էր ներկայանալ չկամեցած մի խորհրդավոր պատգամավոր։
«Այդպես եղել է նախկինում, այդպես է նաեւ այժմ»,- ասաց պարոն Բազեյանը եւ հավելեց, որ ԱԺ աշխատակազմի աշխատավարձերը ավելացել են բյուջետային աշխատողների աշխատավարձերը 20%-ով բարձրացնելու մասին կառավարության որոշման համաձայն, ընդհանուր հիմունքներով։
ՌԵԿՏՈՐՆԵՐԸ ԿԱՍԿԱԾԻ ՏԱԿ
Դաշնակցական խստագույն վերահսկողությունը տարածվում է ոչ միայն բուհերի ընդունելության հանձնաժողովների, այլեւ ռեկտորների վրա։ «Տպավորություն է ստեղծվում, որ դաշնակցական վերահսկիչներից բացի, մնացած բոլորս կաշառակեր մաֆիա ենք»,- «Առավոտի» թղթակցին բողոքեց Երեւանի բուհերից մեկի հարգարժան մի ռեկտոր։ Ըստ պրոֆեսորի, անգամ ռեկտորներ Ռադիկ Մարտիրոսյանին ու Սուրեն Զոլյանին են կասկածում վերահսկիչները՝ նրանց իբր չեն թողնում մտնել իրենց պատկանող բուհական շենքերը։
