Շաբաթ օրվա «Առավոտ»-ը հայտնել է, որ հուլիսի 30-ի լույս 31-ի գիշերը ժամը 2-ին ավտոմատային 3 կրակահերթ է արձակվել նախկին նախագահի առանձնատան ուղղությամբ։ ՆԳ եւ ԱԱ հասարակայնության հետ կապերի եւ լրատվության վարչությունից մեզ հայտնեցին. «Նախնական ստուգումներով՝ ահազանգն անհիմն է։ Նախկին նախագահի թիկնազորի պետի կանչով անհապաղ դեպքի վայր մեկնած ՆԳ եւ ԱԱ աշխատակիցները չեն հայտնաբերել որեւէ հետք կամ իրեղեն ապացույց։ Հարցման ենթարկված մոտակա տների 50-ից ավելի բնակիչներ ժխտել են այդ տարածքում եւ այդ ժամին որեւէ կրակոցի փաստ։ ՆԳ եւ ԱԱ նախարարությունը հետեւողականորեն շարունակում է պարզել ահազանգի հետ կապված բոլոր հանգամանքները»։
ՁԵՐԲԱԿԱԼՈՒԹՅՈՒՆՆԵՐԻ ՀԵՐԹԱԿԱՆ ՍՊԱՌՆԱԼԻՔԸ ՆՈՐ, ԹԱՐՄԱՑՎԱԾ ՑՈՒՑԱԿ
Բարձր իշխանավորների մի շրջանակում համոզված են, որ սեպտեմբերի կեսերին ՀՀ գլխավոր դատախազը միջնորդությամբ կներկայանա Ազգային ժողով՝ ստանալու ԱԺ համաձայնությունը՝ 4 պատգամավորի զրկել պատգամավորական անձեռնմխելիությունից եւ խափանման միջոց ընտրել կալանքը։ Տրվում են Ռազմիկ Դանիելյանի, Վանո Սիրադեղյանի, Արմեն Եղիազարյանի, Նվեր Չախոյանի անունները։
ԳԱԳԻԿ ԳԵՎՈՐԳՅԱՆԸ ՀՅԴ ԱՆԴԱՄ ՉԷ ԵՎ ՉԻ ԼԻՆԵԼՈՒ
Կարդացեք նաև
Օրեր առաջ «Առավոտ»-ում հրապարակվել էր մի լուր, երկրապահական մի կատակ, ըստ որի ՊՆ բարձրաստիճան սպա Գագիկ Գեւորգյանն, իբր, դաշնակցական է։ Երեկ խմբագրություն զանգահարեց գնդապետ Գագիկ Գեւորգյանը եւ հայտնեց, որ ինքը երբեւէ չի կարող անդամագրվել մի կուսակցության, որն իր գոյության ընթացքում միայն հողեր է տվել։
