ԳիԱրՔՄի-ի խորհրդի նախագահ Ալեքսանդր Աղամալյանն, անդրադառնալով «Առավոտի» հարցադրմանը, թե Ռոբերտ Քոչարյանի ստեղծած Քաղաքական խորհուրդը չի կարող լիարժեք լինել առանց Կարեն Դեմիրճյանի գլխավորած Ժողովրդական կուսակցության, պատասխանեց՝ ՀԺԿ-ն դեռեւս չի ձեւավորվել իբրեւ քաղաքական ուժ, սակայն երբ ձեռք բերի այդ որակը, Աղամալյանն ինքը կլինի Կարեն Դեմիրճյանի կուսակցությունը Քաղաքական խորհրդում ընդգրկելու ջատագովներից մեկը։
ՕՐԵՆՍԴՐԱԿԱՆ ՈՒՂԵԾԻՐ
Մոտ օրերս Ազգային ժողովի նախագահին պատգամավորներ Ֆադեյ Սարգսյանի եւ Հովհաննես Թոքմաջյանի կողմից կներկայացվի օրենսդրական մի նախաձեռնություն, որը «Մտավորական Հայաստան» կուսակցության քաղաքական խորհուրդն է մշակել։ Օրենսդրական նախաձեռնությունը վերաբերում է գիտական աստիճանների եւ կոչումների շնորհմանը։ Հովհաննես Թոքմաջյանն այնպես ներկայացրեց, որ այդ օրինագիծը նպատակաուղղված է գիտության զարգացմանն ու գիտական գործունեությամբ զբաղվելը խրախուսելուն։ Կա նաեւ երկրորդ օրենսդրական նախաձեռնությունը, որը վերաբերում է հիվանդանոցների եւ գիտանախագծային հաստատությունների սեփականաշնորհման կարգին։ Եթե այն օրենքի ուժ ստանա, սեփականաշնորհումից կշահեն կոլեկտիվները՝ ստանալով իրենց բաժինը։
