Երեկ «Առավոտ» զանգահարեց թիվ 1 կլինիկայի տնօրեն, ԱԺ պատգամավոր Արտավազդ Սահակյանը եւ հայտնեց, որ իր հիմնարկում անցկացվող կառավարության ստուգումները պլանային էին: Նման ստուգումներ անց են կացվել բոլոր բուժհիմնարկներում եւ ոչ մի քաղաքական ենթատեքստ չունեին:
ՎԱՆՈՆ՝ ՄԱՄՈՒԼԱԹՈՂ
Նորից հետաքրքրության կենտրոնում Վանո Սիրադեղյանի անձն է, մանավանդ դատախազություն հարցաքննության եւ ՆԳՆ առերեսման «հրավիրվելուց» հետո։ Սակավաթիվ երկրներում է այդպես պատահում, որ ՆԳ նախկին նախարարը հայտնվում է նման վիճակում եւ հենց այդքանով էլ հետաքրքիր էր, թե ինչ բնույթի զրույցներ է ունեցել Վանո Սիրադեղյանը։ Սակայն «Առավոտի» ընթերցողի հետաքրքրասիրությունը դեռեւս չենք կարող բավարարել, որովհետեւ պրն Սիրադեղյանը որոշել է մի տեւական ժամանակ հարցազրույց չտալ որեւէ թղթակցի։
ԱԺՄ-Ն ՔՆՆԱՐԿՈՒՄՆԵՐԻ ՄԵՋ
Կարդացեք նաև
Հուլիսի 27-ին տեղի է ունեցել ԱԺՄ վարչության նիստ, որը հետաձգվել է։ ԱԺՄ-ին մերձ աղբյուրները վկայում են, որ ընդհանուր քննարկում է եղել ինչպես ռազմավարական բնույթի, այնպես էլ ընթացիկ հարցերի շուրջ։ Ռազմավարական խնդրո առարկան, ըստ նույն աղբյուրի, այն է եղել, թե ինչպիսի դիրքորոշում եւ կեցվածք պետք է ունենա ԱԺՄ-ն առաջիկա քաղաքական զարգացումների ընթացքում, իսկ ընթացիկ հարցերն առավելապես ներկազմակերպական բնույթ են կրել, վերաբերել են ԱԺՄ կառույցներին, եւ մասնավորապես՝ տեղական ինքնակառավարման մարմինների ընտրություններին նրանց ներկայացուցիչների մասնակցության նպատակահարմարությանը։
