«Առավոտի» խնդրանքով մեկնաբանելով Հրանտ Բագրատյանի «Ազատություն» կուսակցության հայտարարությունը, Վանո Սիրադեղյանն ասաց. «Մարդիկ կան, որոնց չպետք է թողնես, որ լռեն։ Ավելին, պետք է նպաստել, որ խոսեն։ Ինքն այդ դեպքն է։ Եվ հիմա, կարծում եմ, արդեն պարզ է դառնում, թե ինչ հիվանդ է 4 տարի ղեկավարել Հայաստանի տնտեսությունը եւ իրագործել սեփականաշնորհումը»։
Փորձեցինք դրդել, որ մանրամասն անդրադառնա հայտարարության մեջ իր կազմակերպած մարդասպանությունների, իր նվիրած օբյեկտների եւ այլ պնդումներին. «Հայտարարությունը հայտարարություն է մնում,- պատասխանեց պրն Սիրադեղյանը,- կարող եմ ասել, որ իրավապահ մարմիններում նրան եւ նրա տիպի գործ տվողներին չեն գնահատի եւ չեն վճարի. պիտի որոշակի ասվի, որ օբյեկտը, ինչ, ում…»։
«ՇԱՄԻՐԱՄ»-Ը ԵՍ ԵՄ
«Շամիրամ»-ի համանախագահ Շողեր Մաթեւոսյանին ուղղված հարցը, թե արդյոք չգիտի՞, որ «Շամիրամ»-ն իրոք պառակտվելու է, վերջինս լրջորեն պատասխանեց. «Իսկ ես ինչպե՞ս կարող եմ տրոհվել»։
Կարդացեք նաև
ԵՐԵՎԱՆԻ ԹԵՐԹԸ
Շուտով Երեւանի քաղաքապետարանը կհրատարակի սեփական թերթը, որը «Երեկոյան Երեւանը» չի լինելու։ Ըստ երեւույթին, թերթը կկոչվի «Երեւանն այսօր»։ Դեռեւս լուծված չէ խմբագրի հարցը։ Թերթի սկզբունքների շուրջ էլ խորհրդատվություններ են անցկացվում թաղապետերի հետ։
ՈՐՏԵՂԻՑ Է ԳՈՏԿԱՏԵՂԸ
Տավուշի մարզպետ Պավել Ասատրյանը մի անգամ հայտարարել է, թե մինչեւ գոտկատեղը սպիտակցի է, իսկ գոտկատեղից վերեւ՝ տավուշցի՝ կամ հակառակը։ Այս հայտարարության առիթով խորհրդարանում վերջերս լուրջ հարցադրումներ են կատարվում՝ իսկ որտեղացի՞ է Պավել Ասատրյանի գոտկատեղը։
