Հունիսի 21-ին կիրակնօրյա «Լրաբերը» գերհագեցած քաղաքական հաղորդման վերջում հիշեցրեց, որ հունիսի 21-ը բուժաշխատողի օրն է, իսկ բժիշկների լիցենզավորման կենտրոնում տեղեկացա, որ միայն 1998 թ. լիցենզիա է տվել մոտավորապես 2000 (երկու հազար) մարդու։ «Մոտավորապես»-ը պայմանավորված է նրանով, որ լիցենզավորման կենտրոնի տնօրեն Մ. Կիրակոսյանն ասաց, որ առողջապահության նախարարությունում գտնվող բժիշկների լիցենզավորման կենտրոնում համակարգիչ չկա եւ հաշվառումը թղթային է՝ ստույգ թիվ հայտնել հնարավոր չէ։ Տրամաբանորեն, թղթով եւս կարելի է ստույգ թիվ ունենալ, սակայն «տրամաբանություն» տերմինը հիշյալ կենտրոնում չողջունեցին։
Կենտրոնի տնօրեն Մ. Կիրակոսյանին դիմեցի լիցենզավորման հետեւյալ կարգի անտրամաբանությունը պարզաբանելու խնդրանքով։ Ինտերնատուրան ավարտող ապագա բժիշկների լիցենզավորման քննության ժամանակ ստացած թվանշանից է կախված, թե քանի տարվա լիցենզիա կստանա ապագա բժիշկը։ Ասենք, եթե քննության ժամանակ քննվողը ստանում է «երեք»՝ կարող է բժիշկ աշխատել երեք տարի, «չորս» թվանշանի դեպքում՝ չորս տարի, «հինգի» դեպքում՝ հինգ։ Ես առաջարկեցի Մ. Կիրակոսյանին տրամաբանել, եթե քննվողը ստանում է «երեք», նշանակում է, որ նա չի պատասխանել որեւէ ենթաբաժին, այսինքն՝ չգիտի, եւ նրան հնարավորություն է տրվում երեք տարի հիվանդ բուժել։ Մ. Կիրակոսյանը ըմբոստացավ տրամաբանելու իմ առաջարկի դեմ՝ պատասխանելով, որ ինքը «այստեղ նստած է ոչ թե տրամաբանելու, այլ հրամաններ կատարելու համար, եւ, որ ինքը ենթակա մարդ է»։
Լիցենզավորման կենտրոնի տնօրենը համոզեց, որ լիցենզիաների հանձնման կարգի հարցում ինքը կոմպետենտ չէ։ Վերջին մեկ ամսվա ընթացքում «կոմպետենտ» չեմ արտահայտությունը լսել եմ բազմաթիվ չինովնիկներից։ Հավանաբար սա նոր գործելաոճ է, որովհետեւ առաջ անգամ ոչ կոմպետենտ չլինելու դեպքում մարդիկ ուզում էին կոմպետենտ թվալ։ Թեեւ առողջապահության նախարարության շենքի ողջ պարունակությունը հուշում է թղթարարության մենիշխանության մասին։ Այն, որ ինտերնատուրան «3»- ով ամփոփած մարդը բժիշկ լինելու հնարավորություն է ստանում, որեւէ մեկին այս շենքում հուզող խնդիր չէ, այն, որ հիվանդանոցում հիվանդին առաջարկում են գործիքները տանել տուն՝ ախտահանման՝ եւս հետաքրքրության չարժանացող փաստ է, այն որ մանկաբարձն ու մանկական քույրը ծննդատանը շրջում են երկար եւ ներկած եղունգներով՝ առողջապահության այս հսկա շենքի ներսում որեւէ մեկի խնդիրը չէ։ Ինտերնատուրան ավարտողների քննությունները սկսված են, եւ շուտով կունենանք քննությունից «երեք» ստացած հարյուրավոր նոր մասնագետներ։ Կատակը մոտենում է իրողության, թե սրսկվելու համար գնալու ենք արտասահման։
ԼՈՒՍԻՆԵ ՀՈՎՀԱՆՆԻՍՅԱՆ
