-Այս էլ որերորդ անգամ նախագահ Ռոբերտ Քոչարյանն անդրադառնում է Ձեր գործունեությանը։ Նախ, նա հայտարարեց, թե ծանոթ չի եղել Ձեր՝ իբրեւ տնտեսական հարցերով խորհրդականի «խորհուրդներից» որեւէ մեկին։ Իրոք, որեւէ փոխառնչություն չե՞ք ունեցել։
-Չէ, եղել են ե՛ւ առնչություններ, ե՛ւ շփումներ, ե՛ւ հանդիպումներ, ե՛ւ նորմալ համագործակցություն։ Համենայնդեպս, մեկս մյուսի հասցեին դժգոհության կամ հանդիմանանքի առիթներ չենք ունեցել։ Չգիտեմ, հիմա ինչով է պայմանավորված Ռոբերտ Քոչարյանի այդ պատասխանը։
-Օրերս մտավորականության հետ հանդիպման ժամանակ նա նաեւ հայտարարեց, որ կարող են հրապարակել, թե ինչպիսի սեփականաշնորհում էր ընթացել Երեւանում քաղաքապետ Վահագն Խաչատրյանի օրոք։ Ենթադրո՞ւմ եք, թե ինչ փաստեր կարող են «ջրի երես» դուրս բերել։
-Համոզված եմ, որ այդ գնահատականները մատուցված սխալ տեղեկությունների արդյունք են։ Երկար ժամանակ եմ գործադիր իշխանությունում աշխատել եւ որեւէ նման փաստ եւ անգամ ակնարկ չի եղել։ Իմ քաղաքապետ եղած ժամանակ սեփականաշնորհման ողջ գործընթացն իրականացվում էր կառավարության հաստատած կարգով եւ որոշումներով։ Եվ տեղական իշխանություններին (այդ թվում՝ նաեւ Երեւանի քաղաքային խորհրդի գործադիր կոմիտեին) ընդամենը նախօրոք տեղեկացնում էին, որ տվյալ օբյեկտը սեփականաշնորհվելու է՝ մենք էլ պարզաբանում էինք դրա պարտքերի առկայությունը։ Միայն քաղխորհրդի անավարտ շենքի դեպքում էր, որ մենք ավելի գործուն մասնակցություն ունեցանք։ Ռուսաստանի դեսպանատանը վաճառված այդ շենքի համար փաստաթղթերի նախապատրաստումը մենք իրականացրինք, քանի որ այն քաղխորհրդի հաշվեկշռում էր։ Այդ շենքը 7-8 մլն դոլար էինք գնահատել եւ ռուսական իշխանություններն այդ անավարտ շենքի համար այդքան գումար վճարեցին։
Կարդացեք նաև
-Փաստորեն, կոնյակի գործարանն իր ամեն ինչով հանդերձ, մի անավարտ շենքից ընդամենը 4-5 անգա՞մ թանկ գնահատվեց։
-Այո։ Ըստ էության, իմ հասցեին հնչած այդ արտահայտությունների առիթն էլի կոնյակի գործարանն է։ Բայց մեկ անգամ եւս հիշեցնեմ, որ կոնյակի գործարանը նորմալ պայմաններով սեփականաշնորհելու խնդիրը ես դեռ 1997-ին եմ իշխանության տարբեր մակարդակներում արծարծել։ Այնպես որ, իմ կողմից այս հարցադրումները «իրադրության փոփոխության» հետ չեն կապված, ինչպես շատերն են ուզում ներկայացնել, եւ ոչ էլ քաղաքական նպատակներ եմ հետապնդում։ Իրոք, սա միայն տնտեսական սկզբունքային հարց եմ դիտում։ Ինձ համար շատ անհասկանալիորեն՝ նաեւ կառավարության ջանքերով այս հարցը քաղաքականացվեց, մինչդեռ նախապես նպատակս մեկն էր՝ ամբողջական տեղեկություն ստանալ այն ժամանակ դեռեւս չկնքված գործարքի մասին, որ պարզենք, թե արդյոք նման պայմաններով սեփականաշնորհումը նպատակահարմա՞ր է։ Այսօր այս հարցն, այնուամենայնիվ, քաղաքական տարբեր շահարկումների առիթ է դարձել։ Ես դեմ եմ եւ չէի ցանկանա, որ հետագայում էլ սեփականաշնորհման հարցերը քաղաքականացվեին։
-Ռոբերտ Քոչարյանը հայտարարել է, թե մտադիր չէ այս հարցով արտահերթ նիստ հրավիրել։ Նախագահն իրավո՞ւնք ունի անտեսել ԱԺ-ի 1/3-ից ավելի պատգամավորների պահանջը։
-Համոզված եմ, որ պետության բոլոր ներկայացուցիչները եւ առավել եւս՝ նախագահն օրենքի պահանջները պիտի պաշտպանեն։ Քանզի, իրոք, ըստ գործող Սահմանադրության եւ օրենքների՝ այդ նիստը պիտի անպայման հրավիրվի։ Այստեղ միայն ժամկետների անհստակության խնդիր կա։ Բայց ինչո՞ւ է հարկավոր ձգձգել կամ այդ հարցի վերաբերյալ այլ պատճառաբանություններ ներկայացնել։ Եթե իրոք համոզված են, որ այդ գործարքը ճիշտ է կատարվել եւ որեւէ խնդիր չկա՝ թող ԱԺ-ում դա քննարկվի, համապատասխան որոշում կայացվի եւ հարցը դրանով փակվի։
-ԱԺ-ում լուրեր են տարածվել, թե դարձյալ պատգամավորներին փորձում են համոզել, որ արտահերթ նիստի պահանջի իրենց ստորագրություններից հրաժարվեն։ Նաեւ այլ կարգի լուրեր կան, թե ստորագրություններ են հավաքում ԱԺ նախագահին անվստահություն հայտնելու հարցը քննարկելու համար։ Իրականությանը համապատասխանո՞ւմ են այս տեղեկությունները։
-Ինձ ոչ ոք չի դիմել այդ նախաձեռնություններին միանալու համար։ Ես նման տեղեկություններ չունեմ։
-Առիթից օգտվելով, պիտի խնդրեմ եւս մեկ հարց պարզաբանել։ Կոնյակի գործարքի շուրջ հեռուստատեսային բանավեճից հետո, ականատեսների վկայությամբ, Ձեր եւ Վահրամ Ավանեսյանի միջեւ միջանցքում բուռն ընդհարում է տեղի ունեցել։ Եվ Դուք մասնավորապես ասել եք, թե նա պիտի պատասխան տա «Սկադենի» գործունեության՝ ահռելի գումարներով գրված անորակ օրենքների համար։ Ի՞նչ առնչություն ունի Վահրամ Ավանեսյանն այդ ամենին։
-Ես ընտրվել եմ այն հանձնաժողովի անդամ, որը կոչված է ԱԺ-ին 6 ամսվա ընթացքում զեկուցել Հայաստանին տրված վարկերի եւ փոխառությունների արդյունավետ օգտագործման մասին։ Իսկ «Սկադենի» վարկի հետ կապված իսկապես որոշակի հայտնի խնդիրներ կան։ Վահրամ Ավանեսյանին պարզապես ասել էի, թե այն ժամանակ էլ էին վստահեցնում, որ նորմալ վարկային պայմանագրեր են կնքում։ Համեմատության համար ասացի, թե հիմա էլ են համոզում, որ սա լավ գործարք է։ Ընդամենն այս շրջանակներում է խոսակցություն եղել։ Դեռեւս պատրաստ չեմ որեւէ հայտարարություն անել, թե որքանով է Վահրամ Ավանեսյանը կապված «Սկադենի» հետ։ Ի տարբերություն շատերի՝ գտնում եմ, որ ընդհանրապես մեղադրանքներ ներկայացնելու լիազորություն ունի միայն մեկ մարմին՝ դատարանը։
-Բայց դատախազությունն արդեն իսկ կարճել է «Սկադենի» գործը։
-Համարենք, որ այդ ամենը նորից է սկսվում, քանի որ ԱԺ-ի կողմից այդ հանձնաժողովին նման հանձնարարություններ են տրվել։ Այնպես որ, մնացածներին էլ խորհուրդ կտայի սպասել։
Հարցազրույցը վարեց ԱՆՆԱ ԻՍՐԱՅԵԼՅԱՆԸ
