Հունիսի 22-ին «Արդարություն եւ միասնություն» համագործակցության նիստում ընդունվել է հայտարարություն: Գնահատական է տրված ՀՀՇ եւ «Շամիրամ» կուսակցություններին նախագահի հրամանագրով ստեղծված Քաղաքական խորհրդի կազմում ընդգրկելու իրողությանը. կատարվածը համարվել է աննպատակահարմար։ Թե ինչու՝ «Առավոտին» պարզաբանեց ԳիԱրՔՄի-ի խորհրդի նախագահ Ալեքսանդր Աղամալյանը։
Նա ասաց, որ ի սկզբանե ճիշտ չի համարվել ՀՀՇ-ի եւ «Շամիրամի» ընդգրկումը Քաղաքական խորհրդում եւ այս հարցի վերաբերյալ ընդհանուր հայտարարությունը ընդունելիս, առարկություն չի ունեցել ԱՄՀ-ի որեւէ անդամ։ ՀՀՇ-ի դեպքում առկա է վերապահ դիրքորոշում ոչ թե այն պատճառով, որ կուսակցությունը ընդդիմություն է, այլ՝ որ դեռեւս պարզ չէ՝ այն քաղաքական ուժ է, թե՝ ոչ։ Հայտարարվել է, որ կան որոշակի քրեական գործեր, որոնք այսպես կամ այնպես առնչվում են ՀՀՇ-ին։ Մինչեւ հստակություն չլինի, ու չպարզվի իրականությունը, ՀՀՇ-ին չի կարելի ընդգրկել Քաղաքական խորհրդում։ ՀՀՇ-ի ընդգրկումը ՔԽ-ում, ժամանակավրեպ է։
Ինչ վերաբերում է «Շամիրամին», ապա լուրջ չէ այդ կուսակցությանը որեւէ տեղ տալը։ Այն ստեղծվել է քաղաքական կոնյուկտուրայի արդյունքում, դեստրուկտիվ դեր է կատարել, ուստի չպետք է տեղ ունենա ՔԽ-ում։
Ա. Զ.
