ԱԺ պատգամավորներից 66-ը երեկ դարձյալ ստորագրեցին կոնյակի գործարանի հարցով արտահերթ նիստի անցկացման պահանջի տակ։ Նիստի ժամկետները կհստակեցվեն Խոսրով Հարությունյանի եւ նախաձեռնող խմբի հանդիպումից հետո։ Սակայն հստակ է, որ այսօր ժամը 19-ին Անկախության հրապարակում ԱԺ պատգամավորական նախաձեռնող խումբն այս վաճառքի առնչությամբ հանրահավաք կանցկացնի։ Արշակ Սադոյանը երեկ ԱԺ-ից ռադիոլսողներին խոստացավ, որ «այդ հանրահավաքում հրապարակայնորեն կներկայացնենք այն, ինչ ձեզնից անգլերեն լեզվով գաղտնի են պահում»։
ԻՍԿԱՊԵՍ ՈՐ, ՈՉ ՄԻ ՏԱՐԲԵՐՈՒԹՅՈՒՆ
Երեկ ԱԺ-ում սկսվեցին եւ այսօր կշարունակվեն խորհրդարանում ներկայացված խմբերին եւ խմբակցություններին ազգային հեռուստատեսությամբ ուղիղ եթեր տրամադրելու մասին նախաձեռնության քննարկումները։ «Հեռուստատեսության համար ի՞նչ տարբերություն՝ մուլտֆի՞լմ կցուցադրեն, թե՞ որեւէ կուսակցության առաջնորդի»,- այս առնչությամբ ասաց ՍԴՀԿ Հայաստանի վարիչ մարմնի ղեկավար Էռնեստ Սողոմոնյանը։
«ՕՐԻՆԱՑ ԵՐԿԻՐԸ»՝ «ԵՐԿԻՐ»-ԱԿԱՆԻՆ
Կարդացեք նաև
«Օրինաց երկիր» կուսակցության հիմնադիր համագումարի օրը կտպագրվի նաեւ այդ կազմակերպության պարբերականը՝ նույն «Օրինաց երկիր» անունով։ Խմբագիրն է «Երկիր-1» օրաթերթի նախկին աշխատակից, շնորհալի լրագրող Ավիկ Մարությանը։ Պարբերականը կսկսի իբրեւ շաբաթաթերթ, փորձելով դառնալ օրաթերթ։ Տպաքանակը սկզբնական փուլում կլինի 1000 օրինակ, գինը՝ 80-100 դրամ։ Բարի երթ։
