Ի պատասխան ՀՀ արտգործնախարար Վարդան Օսկանյանի չորեքշաբթի օրվա հայտարարության, թե եթե 2-5 տարի եւս Ադրբեջանը շարունակի մերժել խաղաղ բանակցությունների միջոցով Լեռնային Ղարաբաղի հարցի լուծումը, Հայաստանը ստիպված կլինի ձեռնարկել այլ քայլեր, որոնցից մեկը Հայաստանի եւ Ղարաբաղի վերամիավորումը կլինի, պաշտոնական Բաքուն իր տարակուսանքն է հայտնել, որ այդ ծրագիրը պաշտոնապես շարադրվել է Հայաստանի ԱԳՆ ղեկավարի կողմից։ Ադրբեջանի նախագահի արտաքին քաղաքականության հարցերով պետխորհրդական Վաֆա Գուլուզադեն BBC ռադիոկայանի Բաքվի թղթակցի հետ զրույցում Վարդան Օսկանյանի հայտարարությունն անվանել է Երեւանի վերջնագիր։ Գուլուզադեի կարծիքով, այդ վերջնագիրը հասցեագրված է ոչ միայն Ադրբեջանին, այլեւ ԵԱՀԿ-ին։
«Այդ ամենն ավելի քան պարզունակ է թվում, չափազանց անհետեւողական է, եւ Ղարաբաղը զավթելու, այն Հայաստանին միացնելու իրողությունը քողարկելու փորձ է։ Բայց չէ՞ որ Լեռնային Ղարաբաղը համաշխարհային հանրության կողմից ճանաչվել է որպես Ադրբեջանի մաս։ Ադրբեջանի զիջումն այն է, որ մենք Լեռնային Ղարաբաղին տրամադրում ենք ինքնավարության ամենաբարձր մակարդակ Ադրբեջանի կազմում։ Դրանից ավել էլ ի՞նչ է պետք հայերին»,- BBC-ի Բաքվի թղթակցին հարցրել է Վաֆա Գուլուզադեն։
Հեյդար Ալիեւի խորհրդականի խոսքերով, պաշտոնական Բաքուն բլեֆ է համարում Օսկանյանի հայտարարությունում պարունակվող սպառնալից երանգները։ Հակամարտության ռազմական լուծման տարբերակը Գուլուզադեն համարում է քիչ հավանական, քանի որ տարածաշրջանում պատերազմի վերսկսմանը կտրականապես դեմ կլինեն Հայաստանի մերձավորագույն դաշնակիցները, առաջին հերթին՝ Միացյալ Նահանգները։
ԳՐԻԳՈՐ ԷՄԻՆ-ՏԵՐՅԱՆ
