«Հարցը (կոնյակի գործարանի վաճառքի- Վ. Դ.) ինչ-որ տեղ ունի քաղաքական ենթատեքստ։ Պատահական չեմ համարում Լիբանանի վարչապետի հետ հանդիպման ժամանակ Ֆրանսիայի նախագահի հայտարարությունը Ղարաբաղյան հարցի կարգավորման վերաբերյալ, ըստ որի՝ պրն Շիրակը կողմ է խնդրի փաթեթային լուծման տարբերակին»։
ԱԼԲԵՐՏ ԲԱԶԵՅԱՆ ԱԺ փոխնախագահ, «Երկրապահ» կամավորականների միության փոխնախագահ «Հայոց աշխարհ», 10 հունիսի
Եթե Շիրակը, օրինակի համար, Բուրկինա Ֆասոյի վարչապետին եւս հայտարարի, որ ինքը կողմ է Ղարաբաղյան խնդրի փաթեթային լուծմանը՝ անհապաղ պետք է Ֆրանսիային վաճառել, ասենք, Մատենադարանը:
Դե, իսկ եթե Շիրակն այդքանով չբավարարվի եւ Ղարաբաղյան խնդրի կարգավորման վերաբերյալ իր տեսակետը հայտնի եւս մի քանի վարչապետների՝ ապա կասկած չկա, որ հաջողությամբ կավարտենք ամբողջ Հայաստանը վաճառելու գործընթացը… Որից հետո Շիրակը կարտասանի վերնագրում չակերտված ճակատագրական նախադասությունը։
ԱՆՁԻ ԵՐԿՎՈՒԹՅՈՒՆ
Կարդացեք նաև
«Որպես ոչ թե նախարար, այլ հայ քաղաքացի, կարծում եմ, որ անպայման պետք է սեփականաշնորհվի (կոնյակի գործարանը- Վ. Դ.), որովհետեւ այսօր վիճակն այնպիսին է, որ եթե հանկարծ կոնյակի գործարանի տնօրենը այսօր ուզենա սպիրտները վաճառել, արգելող չկա»։
ԴԱՎԻԹ ԶԱԴՈՅԱՆ Տարածքային կառավարման նախարար, «ՀՀ», 10 հունիսի
Որպես քաղաքացի՝ պարոն Զադոյանը ցավում է սպիրտների հետագա ճակատագրի համար, դեմ լինելով, որ դրանք վաճառվեն, բայց չի ցավում գործարանի ճակատագրի համար, կողմ լինելով, որ այն վաճառվի։
Ենթադրվում է, որ որպես նախարար՝ պարոն Զադոյանը պետք է որ հակառակը պնդի։
ՓՐԿՎԵՑԻՆՔ
«Նորմալ գործարք է (կոնյակի գործարանի վաճառքը– Վ. Դ.)։ Սրանից կշահի հայ գյուղացին, հայ ժողովուրդը»։
ՇԱՀԵՆ ԿԱՐԱՄԱՆՈՒԿՅԱՆ Օպերատիվ հարցերի նախարար, «ՀՀ», 10 հունիսի
Վերջին տարիներին հայ գյուղացու, հայ ժողովրդի ծայրահեղ աղքատության ու թշվառության, այսինքն՝ որեւէ բան չշահելու պատճառն իրավամբ կարելի է համարել կոնյակի գործարանը չվաճառելը։
ՎԱՍԱԿ ԴԱՐԲԻՆՅԱՆ
