«Մենք բարոյական իրավունք չունենք կոնյակի գործարանի մասին այժմ խոսելու»,- ասաց ՀՀՇ վարչության նախագահ Վանո Սիրադեղյանը։ Եվ հիմնավորեց. «Մեր «սիրելի» կառավարությունը գինու գործարանը 70 հազար դոլարով էր սեփականաշնորհել։ Ընդ որում, ԱԺ-ն օրենքի խախտումով էր ճարտարապետական այդ հուշարձանը սեփականաշնորհման ցանկի մեջ մտցրել։ Իսկ կոնյակի գործարանը, որն այդպիսի հուշարձան չէ, հաստատ շատ ավելի թանկ չի։ Եվ այս կառավարությունն էլ, փաստորեն, շատ ավելի թանկ գնով է այն սեփականաշնորհում, քան մենք՝ գինու գործարանը»։
ՇԻՐԱԿԸ՝ ՀՅՈՒՐԱՍԻՐՎԵԼՈՒ ՏԵՂ
Խորեն Սարգսյանը վկայեց, որ Խոսրով Հարությունյանն իրեն համոզելու համար, թե կոնյակի գործարանը սեփականաշնորհման ցանկից հանելը «հակազգային» քայլ է՝ նաեւ հետեւյալ փաստարկն էր բերել. «Ժակ Շիրակը շուտով գալու է, որոշել էինք նրա պատվին ճաշկերույթը կոնյակի գործարանում կազմակերպել»։ Պրն Սարգսյանը ճեպազրույցում ԱԺ նախագահին այլընտրանքային առաջարկ հղեց. «Տարեք Շիրակին Ձեր տանը հյուրասիրեք։ Կամ էլ էդքան ռեստորաններ կան՝ ինչ պակաս են»։
ՍԱԴՈՅԱՆԸ՝ ԱՊԱՑՈՒՑԵԼՈՒ ՀՆԱՐԱՎՈՐՈՒԹՅՈՒՆ
Կարդացեք նաև
Արշակ Սադոյանը ճեպազրույցում հայտարարեց, թե կոնյակի գործարանը չեն ցանկանում ավելի բարձր գին տվողներին վաճառել, քանի որ «առնվազն մոտ 100 մլն դոլարի կաշառք են վերցրել որոշ մարդիկ»։ «Առավոտի» այն հարցին, թե կարո՞ղ է ապացուցել իր այդ պնդումը, Սադոյանը պատասխանեց. «Իհարկե չեմ կարող։ Դա հնարավոր էլ չէ, դրա համար դատախազության միջամտությունն է հարկավոր»։
