Բոլորովին այլ առիթով՝ դեղերի գործարանի բացման արարողության ժամանակ, հանդիպելով ՀՀ նախագահին, մի խումբ լրագրողներ, բնականաբար, փորձեցինք պահը որսալ, հարցնել կոնյակի գործարանի այնքան վիճահարույց խնդրի շուրջ։ Կոնյակի գործարանի սեփականաշնորհման հետ կապված մեր հարցերին ՀՀ նախագահը պատասխանեց. «Ուղղակի մարդիկ (գուցե դա նաեւ մեր մեղքն է) լիարժեք ինֆորմացիա չունեն։ Բայց այն գործարքը, ինչին մենք այսօր հասել ենք, բավական դրական է։ Կա շփոթության երկու տեսակ. մեկը՝ մարդիկ տեղյակ չեն գործարքի մանրամասներից եւ 2-րդը՝ կան մարդիկ, ովքեր գիտակցաբար են փորձում խանգարել։ Դա էլ է բնական»։ Այն հարցին, թե ո՞ր ուժերը նկատի ունի նախագահը՝ դրսի, թե՝ տեղական, Ռոբերտ Քոչարյանը պատասխանեց. «Ոչ միայն տեղական։ Երբ որ գործարքը հասնում է իր ավարտին (բայց այդ գործարքը մենք պատրաստում ենք մոտ մեկ տարի), անպայման կողքից հայտնվում են ընկերություններ կամ մարդիկ, որոնք ուղղակի պատրաստ են խանգարել՝ այլ խնդիրներից ելնելով։ Ես համոզված եմ, որ գործարքը լավ գործարք է լինելու»։
Մ. ԵՍԱՅԱՆ
