Քննիչ- Մեղադրյալ Հորիզոն, դուք գիտե՞ք ինչի համար եք մեղադրվում։
Մեղադրյալ- Կռահեցի։ Երեւի ծննդյանս օրը հուլիսի 10-ից դեկտեմբերի 1-ը տեղափոխելու համար։
Քննիչ- Իսկ Դուք գիտե՞ք, որ դա նույնպես կեղծարարություն է։
Մեղադրյալ- Համենայնդեպս, զեղծարարություն չէ։
Կարդացեք նաև
Քննիչ- Ի՞նչ, ուրեմն Դուք ուզում էիք բռնել նաեւ զեղծարարությա՞ն ճանապարհը։
Մեղադրյալ- Ախր, ես…
Քննիչ- Լռե՛ք, երբ որ խոսում են։
Մեղադրյալ- Հենց էնպես խոսողին լսում են հենց էնպես։
Քննիչ- Դուք պարտավոր եք ենթարկվել օրենքին։
Մեղադրյալ- Այդ ո՞ր օրենքն է մեզ հոր նման պաշտպանել։
Քննիչ- Հանգիստ նստեք, ի՞նչ եք անընդհատ կողքի շրջվում։
Մեղադրյալ- Ի՞նչ է, կարծում եք ամեն կողքի վրա շրջվելը հեղաշրջո՞ւմ է։
Քննիչ- Գոնե Ձեր տարիքից ամաչեք։
Մեղադրյալ- Մինչեւ չամաչելը պիտի ամաչեի։
Քննիչ- Լռե՛ք։
Մեղադրյալ- Ինչ է, ուզում եք Ձե՞ր ձայնը լսել։
Քննիչ- Դուք մեղադրվում եք նաեւ փողոցներում եւ հասարակական վայրերում Շիրազին նմանակելու համար։
Մեղադրյալ- Շնորհքի հարց է։ Կարող եք՝ Դուք էլ նմանակեք։
Քննիչ- Ո՞ւմ, Շիրազի՞ն։
Մեղադրյալ- Բա էլ ուրիշ գրող կա՞։
Քննիչ- Իսկ Դուք գիտե՞ք, որ ոչ թե նմանակում, այլ կողոպտում ու գողանում եք մեծանուն բանաստեղծին։
Մեղադրյալ- Ում շատ է տրված՝ նրանից շատ են գողանում։
Քննիչ- Դարձյալ սրամտում եք, հա՞:
Մեղադրյալ- Իսկ Դուք սրամիտների շրջապատում ոտաբոբիկ մի քայլեք։
Քննիչ- Համենայնդեպս, Շիրազ չեք լինի։
Մեղադրյալ- Ի՞նչ արած, Հռոմը փրկող սագերին էլ մորթեցին, կերան։
Քննիչ- Դրա համա՞ր եք աշխարհը փրկող Մեծ Առաջնորդի պատվանդանին մի շնչով տիրացել (վկա՝ լուսանկարը):
Մեղադրյալ- Բա էլ ո՞ր օրվա համար եմ պահել երկրորդ շնչառությունս։
Քննիչ- Երեւի ուզում էիք նորանոր Հորիզոննե՞ր հայտնաբերել Բարձունքից։
Մեղադրյալ- Նման պատվանդաններից Հորիզոնում ոչինչ չի երեւա։
Քննիչ- Երեւում է՝ հարուստ երեւակայություն ունեք։
Մեղադրյալ- Հարուստ երևակայությունը փոքր հարստություն չէ։
Քննիչ- Իսկ ի՞նչ է Ձեր կարծիքով։
Մեղադրյալ- Համենայնդեպս, փող չէ, որ տարբեր գրպաններում դնեք՝ մարմինը տաքանա։
Քննիչ- Է՛, դրանք թեթեւ մտքեր են։
Մեղադրյալ- Այդպես է միշտ, ամենաթեթեւ մտքերը նստում են լեզվի ծայրին։
Քննիչ- Ձեզ հետ խոսելը կրակ է, կրակ։
Մեղադրյալ- Գոնե մի քիչ տաքացա՞ք։
Քննիչ- Ոչ միայն տաքացա, այլեւ կրակն ընկա։ Հիմա ես Ձեզ ո՞ր հոդվածով մեղադրեմ։
Մեղադրյալ- Նախ իմ 68-ամյակի առթիվ մի հոդված գրեք, հետո նոր…
Քննիչ- Հետո ի՞նչ։
Մեղադրյալ- Հետո կլինեմ 69:
Քննիչ- Դե, լավ, լավ։ Շնորհավորում եմ Ձեզ՝ ծննդյան օրվա առիթով։ (Մեկնում է ձեռքը):
Մեղադրյալ- Շնորհակալություն։ Այնպես չսեղմեք, որ չկարողանամ այլեւս գրիչ բռնել։
Քննիչ- Դուք էլ բանավոր ստեղծագործեք։
Մեղադրյալ- Չգրված օրենքները գրվածից վարժ են կարդացվում…
Սարո ԳՅՈԴԱԿՅԱՆ
