Այսուհետ նախագահն ընդունելու է բոլոր հրաժարականները
Մեր թերթի նախորդ համարում լրատվություն էր հրապարակվել, որը ստացվել էր ոչ պաշտոնական աղբյուրներից: Այդ լրատվության համաձայն, գիտության եւ կրթության փոխնախարար Աշոտ Բլեյանը հրաժարական էր տվել: Ցավոք սրտի, այդ լուրը ճշգրիտ չէր: Հրաժարական է տվել գիտության եւ կրթության նախարար Արմենակ Ղազարյանը: Անճշտության համար հայցում ենք ընթերցողի ներողամտությունը։ Հրապարակման մեջ բարձրացված խնդիրները, կապված Գիտության եւ կրթության նախարարության հետ, այնուամենայնիվ, մնում են ուժի մեջ:
Մենք դիմեցինք նախագահի մամլո քարտուղարի պաշտոնակատար Լեւոն Զուրաբյանին, խնդրելով մեկնաբանել Արմենակ Ղազարյանի հրաժարականի լուրը: Պրն Զուրաբյանը «Առավոտի» թղթակցին ասաց հետեւյալը. «Արմենակ Ղազարյանը նախկինում եւս դիմել էր հանրապետության նախագահին հրաժարականի խնդրանքով, բայց նախագահը համոզել էր նրան շարունակել աշխատանքը։ Սակայն վերջերս նախագահը որդեգրել է չգրված օրենքի պես մի սկզբունք, ըստ որի՝ ցանկացած պաշտոնյայի հրաժարականը այսուհետ կընդունվի իր կողմից առանց քննարկման։ Սրանով նախագահը ընդգծում է հարգանքն իր հետ աշխատող մարդկանց պատասխանատվության զգացման
նկատմամբ։ Այս մասին բոլորին հայտնված է, եւ Արմենակ Ղազարյանը նույնպես տեղյակ է եղել»։
