Հուլիսի 27-ից ուժի մեջ են մտել ԻԻՀ նկատմամբ Եվրամիության սահմանած նոր պատժամիջոցները, որոնք տարածվում են նաեւ իրանական «Մելլաթ» բանկի հայաստանյան մասնաճյուղի վրա: Չկարողանալով միջուկային ծրագրի շուրջ համաձայնության գալ Թեհրանի հետ՝ երկուշաբթի օրը ԵՄ արտգործնախարարների խորհուրդը լրացուցիչ պատժամիջոցներ մտցրեց Իրանի նկատմամբ, որոնց հիմնական թիրախը դարձան իրանական բանկերը, օդային ու ծովային ուղիներով ապրանքներ փոխադրող ընկերությունները, նաեւ Իսլամական հեղափոխության պահապանների կորպուսը՝ հաղորդում է «Ազատություն» ռ/կ-ն: Եվրոպական ընտանիքի պատմության մեջ երբեւէ ընդունված ամենախիստ այդ սահմանափակումներով Բրյուսելը սառեցրեց 10 բանկային խմբերի, 6 ավիաընկերությունների, ավելի քան 20 ձեռնարկությունների հաշիվները եվրոպական բանկերում՝ պնդելով, թե դրանք աջակցում ու նպաստում են Իրանի միջուկային ծրագրի իրագործմանը: «Պատժված» բանկերի ցանկում են հայտնվել «Մելլաթ» բանկի բրիտանական եւ հայաստանյան մասնաճյուղերը, «Ռեֆահ» բանկը, Սադերատ Իրանը, ինչպես նաեւ «Մելլի» բանկի հետ առնչություն ունեցող ավելի քան 15 ընկերություններ: Նոր սահմանափակումներն արգելում են եվրոպական ներդրումները Իրանի գազի ու նավթի արդյունաբերության ոլորտում, ինչպես նաեւ՝ մի շարք բարձրաստիճան իրանցի պաշտոնյաների մուտքը Եվրոպա: