Երեկ «Առավոտը» ստացել է Երեան քաղաքի Էրեբունի վարչական շրջանի աշխատակազմի պարզաբանումը, որում, մասնավորապես, գրված էր. «Հարգելի խմբագրություն, Ձեր թերթի հուլիսի 27-ի համարում տպագրված «Խաղահրապարակի դեֆիցիտ է» վերնագրով հոդվածի առնչությամբ հարկ ենք համարում տեղեկացնել, որ Արցախի պողոտայում խաղահրապարակի «դեֆիցիտ» է արտահայտությունը չի համապատասխանում իրականությանը: Արցախի պողոտայի բազմաբնակարան շենքերով շրջապատված 6 բակային տարածքներից 4-ում կան խաղահրապարակներ՝ համապատասխան խաղերով: Արցախի 10ա, բ, վ, գ, դ շենքերով պարփակված տարածքում կահավորվել եւ գործում է եվրոպական չափորոշիչներին համապատասխան մինի ֆուտբոլի խաղադաշտ, որը հարմարեցված է նաեւ որպես բասկետբոլի խաղահրապարակ: Խաղադաշտեր կան Արցախի պողոտայի 1, 8, 8/1, 8/2, 8/3, ինչպես նաեւ 20, 21, 22 շենքերի բակերում: Բազմաթիվ բակերում (օրինակ՝ Արցախի 1, 10բ, գ, դ, 18, 22) տեղադրվել են զրուցարաններ:
Բացի այդ՝ 2009-2010թթ. Երեւանի քաղաքապետարանի եւ Էրեբունի վարչական շրջանի ծրագրերով զգալի աշխատանքներ են կատարվել Էրեբունի վարչական շրջանի տարբեր հատվածներում, այդ թվում նաեւ Արցախի պողոտայում: Մասնավորապես ասֆալտապատված են պողոտայի բոլոր բակային տարածքները, որոնք ապահովված են նաեւ գիշերային լուսավորությամբ: Թիվ 24 շենքի բակային տարածքում ներկայումս տեղադրվում են արտասահմանյան արտադրության ժամանակակից խաղային ատրակցիոններ: Մնացած այն բակերում, որտեղ տարածքները հնարավորություն են ընձեռում՝ խաղային ատրակցիոններ կտեղադրվեն հաջորդ տարվա ծրագրերով:
Տեղեկացնենք նաեւ, որ այս տարի միայն Արցախի փողոցում նորոգվել է շուրջ 2000քմ հարթ տանիք: Բազմաբնակարան մի շարք շենքերի (Արցախի 1, 1բ, 18, 20, 21, 22 եւ այլն) շքամուտքերում տեղադրվել են ժամանակակից, այդ թվում նաեւ թվային կոդավորումով մուտքի դռներ»: