Տարիներ առաջ Գյումրիում կատարված աննախադեպ նվիրատվությանը մեր թերթն արդեն անդրադարձել է (01.06.2010թ., «Որտե՞ղ փնտրել արդարությունը»): Երկու տողով հիշեցնեմ գործը. նախկին մարզպետ Ֆ. Փիրումյանը 2002թ. ապրիլի 23-ին Գյումրու Խրիմյան Հայրիկ 59 հասցեի շենքը (բնակիչներով) նվիրաբերել էր իր սանիկ, «Պրոգրես» համալսարանի ռեկտոր Ռաֆիկ Խաչատրյանին: Շուրջ 8,5 տարի է արդարացի լուծման փորձ չի արվում, չնայած բնակիչների ներդրած մեծ ջանքերին: Տեղի են ունեցել տարբեր ատյանների դատարանների բազմաթիվ նիստեր, կայացվել անընդունելի վճիռներ: Ինչպես արդեն մեր ընթերցողներին տեղեկացրել ենք, գյումրեցիներն այսօր էլ դատական ատյանների դռներին են. նվիրատվության պայմանագիրը՝ 420 քմ. տարածքը (350 քմ. բնակելի շենքի մասով, 70-ը՝ շենքի նկուղային մասն է) անվավեր ճանաչելու պահանջով դիմել են ՀՀ վճռաբեկ դատարան: Չնայած գործը դատարան է ներկայացվել հունիսի 15-ին ու վաղուց լրացել է սահմանված ժամկետը, այդուհանդերձ, գյումրեցիները մինչ օրս այն վարույթ ընդունելու մասին ծանուցագիր չեն ստացել: Փոխարենը հայցվորների տուն է այցելել նույն ինքը՝ դատավոր Մամիկոն Դրմեյանը, պատասխանող Ռ.Խաչատրյանի կրտսեր որդու հետ, ներկայացել իբր գործը քննող դատավարության նախագահող դատավոր ու մոտ կես ժամ փորձել է համոզել բողոքողներին՝ հաշտվել փոխհատուցման պայմանին, քանի որ նրանց բնակարանները խոնավ են, ապրելու համար անպիտան (ինչպիսի հոգատարություն բնակիչների հանդեպ): Բնակիչները խիստ զարմացել են, որ դատավորը կարող է իրեն վտանգել ու թույլ տալ պատասխանողի բանագնացը դառնալ եւ այս «տրյուկին» պատասխանել են, որ իրենց բնակարաններից դուրս չեն գա ու կշարունակեն պայքարը: