«Առավոտի» հարցին՝ Հաագայի դատարանի որոշումից հետո Հայաստանը եւ ԼՂՀ-ն գործնականում ի՞նչ քայլեր պետք է ձեռնարկեն, ԱԻՄ նախագահ Պարույր Հայրիկյանն ասաց. «Ամենաառաջինը, որ, այսպես կոչված, հայ քաղաքական իշխանությունները պետք է ձեռնարկեն՝ հստակեցնեն, թե իրենք ի՞նչ են ուզում եւ իրենց ուզածը իրավական հիմնավորումներով ներկայացնեն աշխարհին: Թե չէ՝ սկսեցին «Միացումով», այն ժամանակ, երբ ԱԻՄ-ն ասում էր միավորում՝ Արցախի ինքնորոշման ճանապարհով, հիմա «Միացումը» մոռացան, գոռում են՝ «Անկախություն»: Հայաստանի եւ Արցախի իշխանություններից մի բան էր պահանջվում՝ հասկանալ, որ մեկ միասնություն ենք, ունենք մեկ ելակետ, եւ որ մեր բոլոր գործողությունները միասնական կարելի է կոչել հայկական հարցի լուծում կամ Ցեղասպանության հետեւանքների վերացում: Ցեղասպանություն, որի գնահատականը մենք չենք տալիս, այլ ԵՄ-ն է տվել՝ 1915-23 թվականները, ներառյալ Արցախի հանձնումն Ադրբեջանին: Այս տեսակետով պետք է ասպարեզ իջնել եւ հարցն աշխարհի առջեւ այդպես էլ դնել՝ Հայկական պետությունն իր առաքելությունն է համարում աշխարհի, նաեւ թուրքերի հետ միասին, նվազագույնի հասցնել հայ ժողովրդին հասցված Ցեղասպանության հետեւանքները»: